पणजी: गोवा मुक्तीच्या (Goa Liberation) साठाव्या वर्षानिमित्त कोणते कार्यक्रम करावेत याविषयी सरकारचे (Goa Government) काही ठरता ठरेना अशी स्थिती आहे. कोविड (Covid-19)महामारी अद्याप आटोक्यात न आल्याने आणि तिसऱ्या लाटेच्या धोक्याची टांगती तलवार असल्याने आज मुख्यमंत्री प्रमोद सावंत (CM Pramod Sawant) यांनी यासंदर्भात बोलावलेल्या बैठकीत काही ठोस निर्णय होऊ शकला नाही.

या बैठकीकडे विरोधकांनी तर पाठ फिरवली होती. त्यामुळे या बैठकीत काही महत्वाची चर्चा झाली नसल्याची माहिती मिळाली आहे. उपमुख्यमंत्री चंद्रकांत कवळेकर, मनोहर आजगावकर, आमदार चर्चिल आलेमाव, माजी मुख्यमंत्री लक्ष्मीकांत पार्सेकर, राज्याचे मुख्य सचिव परीमल राय व अन्य सरकारी अधिकारी यांच्या उपस्थितीत ही बैठक झाली. केंद्र सरकारने गोवा मुक्तीच्या साठाव्या वर्षानिमित्त 300 कोटी रुपयांचा निधी देण्याची घोषणा केंद्रीय अर्थसंकल्पात केली आहे. त्याच्या विनियोगासाठी अनेकांचा समावेश असलेली समिती सरकारने नेमली खरी. मात्र, आता समितीच्या सदस्यांचा उत्साह मावळल्याचे दिसत आहे.

निवडणुकीपूर्वी वातावरण निर्मितीसाठी सरकार गाव व तालुका पातळीवर अनेक कार्यक्रम या माध्यमातून करण्यास इच्छूक आहे. मात्र, कोविड प्रसाराला हे कार्यक्रम कारणीभूत ठरले तर विरोधक तुटून पडतील याची कल्पनाही सरकारला आहे. त्यामुळे सरकारही जरा बेतानेच याविषयी निर्णय घेऊ पाहत आहे. आजच्या बैठकीतही त्याचेच प्रतिबिंब होते अशी माहिती मिळाली आहे.

300 कोटींचा विनियोग कसा?

गोवा मुक्तीच्या साठाव्या वर्षानिमित्त केंद्र सरकारने 300 कोटी रुपयांचा निधी देण्याची घोषणा केंद्रीय अर्थसंकल्पात केली आहे. त्याच्या विनियोगासाठी राज्य सरकारने समितीही नेमली आहे, परंतु यासंदर्भातील बैठकीतही कोणतीच ठोस चर्चा होत नाही. विरोधकांनीही या बैठकीकडे पाठ फिरविल्याने समिती सदस्यांचा उत्साह मावळला असून 300 कोटींचा विनियोग कसा करणार असा प्रश्न निर्माण झाला आहे.