पेडणे: मधलावाडा-हरमल परिसरात रात्रीच्या वेळी बिबट्याचा वावर असल्याचं समोर आलं आहे. काल मध्यरात्री अडीचच्या सुमारास बिबट्यानं रहिवासी मार्सेलीन फर्नांडिस यांच्या पाळीव कुत्र्याला उचलून नेल्याची घटना समोर आलीय. या घटनेमुळं स्थानिकांमध्ये भीतीचं वातावरण निर्माण झालं आहे.

समोर आलेल्या माहितीनुसार, रात्री २.३९ वाजण्याच्या सुमारास बिबट्यानं मधलावाडा-हरमल येथील रहिवासी फर्नांडिस यांच्या घरासमोरील गेटवरून थेट अंगणात उडी मारली. त्यानंतर साखळीने बांधून ठेवलेल्या कुत्र्यावर झडप घातली व त्याला उचलून बिबट्या जंगलाच्या दिशेनं पसार झाला.

या अचानक झालेल्या हल्ल्यामुळं कुत्र्यानं मोठमोठ्यानं भुंकण्यास सुरुवात केली. कुत्र्याच्या भुंकण्यामुळं फर्नांडिस कुटुंबीय जागं झालं. त्यांनी तत्काळ बाहेर येऊन पाहणी केली, मात्र तोपर्यंत बिबट्या कुत्र्यासह गायब झाला होता.

फर्नांडिस कुटुंबीयांनी सीसीटीव्ही फुटेज तपासलं असता, बिबट्यानं त्यांच्या पाळीव प्राण्यावर हल्ला करून त्याला जंगलात नेल्याचं नेल्याचं स्पष्ट झालं.

गेल्या काही महिन्यांपासून हरमल, पेडणे भागात जंगली प्राण्यांच्या वावरामुळं लोकांमध्ये भीतीचं वातावरण निर्माण झालं आहे. परिसरातील नागरिकांनी वनविभागाकडे बिबट्याला जेरबंद करण्याची मागणी केली आहे.