पणजी, अनाथांना अनुकंपा तत्त्वावरील नोकरीत प्राधान्य द्यावे असा कोणताही नियम नाही. मात्र तसा नियम करण्याविषयी सरकार विचार करेल, असे आश्‍‍वासन मुख्यमंत्री डॉ. प्रमोद सावंत यांनी आज विधानसभेत दिले.

केपेचे आमदार एल्टन डिकॉस्‍टा यांनी शून्य तासाला हा विषय उपस्थित केला होता. ते म्हणाले की, केपे मतदारसंघातील एका दाम्पत्याचा अपघातात मृत्यू झाल्यानंतर अनाथ झालेल्या मुलांपैकी एकाला अनुकंपा तत्त्वावर नोकरी देण्याचे वर्षभरापूर्वी सरकारने आश्‍‍वासन दिले होते. मात्र अद्याप त्याला नोकरी मिळालेली नाही. सरकार खास बाब म्हणून अशा लोकांचा विचार अनुकंपा तत्त्वावर नोकरी देण्यासाठी करणार आहे का?

त्यावर मुख्यमंत्री म्हणाले, तसा कोणताही नियम नाही. अनुकंपा तत्त्वावर नोकरी मिळवण्यासाठीची यादी मोठी आहे. किमान तीनशे जण प्रतीक्षेत आहेत. ‘प्रथम अर्ज केलेल्यास प्रथम’ या तत्त्वावर नोकरी दिली जाते.

मात्र अनाथांसाठी नोकरीत प्राधान्य देण्याबाबत नियम करण्याचा विचार करता येईल. सरकारी नोकरी मिळविण्यासाठी अशा अर्जदारांचे वय उलटून गेले असेल तर त्याबाबत सरकार सहानुभूतीपूर्वक निश्‍चितपणे विचार करेल.