Suleman Khan Escaped From Jail CCTV Footage Video

पणजी: जमीन हडप प्रकरणातील मुख्य आरोपी सिद्दीकी (सुलेमान) खान गुन्हे शाखेच्या कोठीतून फरार झाला आहे. आयआरबी पोलिस कॉन्स्टेबल अमित नाईक याने सुलेमानला कोठतून बाहेर काढण्यास मदत केली. आरोपी सुलेमान आणि अमित दोघेही सध्या फरार आहेत. पोलिस त्यांचा शोध घेत असून, यंत्रणा हाय अलर्टवर ठेवण्यात आली आहे.

गुन्हे शाखेच्या कोठडीत असणारा सुलेमान खान याला आयआरबी पोलिस कॉन्स्टेबल अमित नाईक याने शुक्रवारी पहाटे अडिचच्या सुमारास कोठडीतून बाहेर काढले. बाहेर आल्यानंतर दोघेही दुचाकीवरुन फरार झाले. या संबंध घटनेचे सीसीटीव्ही फुटेज समोर आले आहे.

समोर आलेल्या व्हिडिओनुसार, कॉन्स्टेबल अमित नाईक आरोपी सुलेमान खानला कोठडीतून बाहेर काढतो. सुलेमान बाहेर आल्यानंतर चपला घालून दोघेही बाहेर पडतात. पुढे दुचाकीवरुन दोघेही फरार झाल्याचे व्हिडिओत दिसत आहे. पोलिसांनी घटनेचे गांभीर्य लक्षात घेता दोघांच्या शोधासाठी सर्व पोलिस स्थानकांना अलर्ट राहण्याचे आदेश दिले आहेत. तसेच, विमानतळ, रेल्वे स्थानक आणि सीमाभागातील पोलिसांना देखील सतर्क राहण्याची सूचना दिलीय.

सुलेमान खान जमीन हडप प्रकरणातील मुख्य आरोपी आहे. याशिवाय त्याच्याविरोधात इतर गुन्हे देखील आहेत. गेल्या ४.५ वर्षापासून तो फरार होता. सुलेमान कोठडीतून फरार होताच गुन्हे शाखेचे पोलिस अधीक्षक राहुल गुप्ता यांच्या अध्यक्षतेखाली उच्चस्तरीय बैठक पार पडली. यावेळी उपस्थित अधिकाऱ्यांनी सुलेमान आणि अमित नाईक यांच्याविरोधात सक्त कारवाई केली जाईल, अशी माहिती दिली.

दरम्यान, आता या घटनेवरुन राज्यात राजकारण सुरु झाले आहे. आरोपी कोठडीतून फरार होतो यावरुन कोठडीच्या सुरक्षेबाबत गंभीर प्रश्न उपस्थित होतात. सुलेमानला कोठडीत व्हिआयपी ट्रिटमेंट मिळत होती. तो कोठडीच्या बाहेर खाटेवर झोपत होता. गुन्हे शाखा आणि गृहमंत्र्यांनी याबाबत उत्तर द्यायला हवे, असे काँग्रेस प्रदेशाध्यक्ष अमित पाटकर म्हणाले.

पाटकर यांच्यासह गिरिश चोडणकर यांनी देखील याप्रकरणी गुन्हे शाखेचे पोलिस अधीक्षक राहुल गुप्तांना दोषी धरत राजीनामा देण्याची मागणी केली. तसेच, सुलेमानचे पलायन पूर्वीचे प्लान केले होते का? असा सवाल देखील चोडणकरांनी उपस्थित केला.