Goa Theft Case: कोरगाव पेठेचा वाडा या मुख्य रस्त्यावर चोरट्यांनी महिलेचे मंगळसूत्र हिसकावण्याच्या प्रयत्न केलाय. या घटनेमुळे परिसरात एकच खळबळ माजली असून दिवसाढवळ्या घडलेल्या प्रकाराने महिलावर्गात दहशत निर्माण झाली आहे.

या संबंधी मिळालेल्या माहितीनुसार कोरगाव पेठेचा वाडा या मुख्य रस्त्यावरून हळदी कुंकू समारंभासाठी 3-4 महिलांचा ग्रुप जात असताना त्यांच्या पाठीमागून चालत आलेल्या दोघा चोरट्यांनी त्या ग्रुपमधील एका महिलेच्या गळ्यातील मंगळसूत्र हिसकावले. मात्र त्या महिलेने आणि सोबतच्या अन्य महिलांनी चोरट्यांना थोपवण्याचा प्रयत्न केला.

या झालेल्या झटापटीत मंगळसूत्र तुटून रस्त्यावर पडले. चोरीचा ऐवज हाती येत नाही हे पाहून त्या चोरट्यांनी तिथून पळ काढला. याचवेळी मागाहून येणाऱ्या अन्य महिलांनी त्या चोरट्याचा पाठलाग केला.

घटनास्थळी त्या चोरट्यांचे चप्पलआणि मोबाईल सापडला असून एकाने हिरव्या रंगाचा शर्ट तर एकाने टीशर्ट घातला असल्याची माहिती त्या महिलांनी दिली आहे.

ही घटना गुरुवारी संध्याकाळच्या सुमारास घडली असून घटनेनंतर या वाटेने जाणाऱ्यांची घटनास्थळी गर्दी जमा झाली होती.