Kalasa Banduri Project: म्हादई (मांडवी) नदीचे पाणी कर्नाटकातील मलप्रभा नदीपात्रात वळविण्यासाठी निविदा काढण्याची सर्व तयारी कर्नाटक सरकारने केली होती.

मात्र, या कळसा-भांडुरा प्रकल्पाला केंद्रीय वन्यजीव मंडळाने मंजुरी देण्याबाबत निर्णय लांबणीवर टाकल्याने हा प्रकल्प तडीस लावता आला नाही, अशी खंत कर्नाटकचे मुख्यमंत्री सिद्धरामय्या यांनी बंगळुरू येथील विधानसभेत २०२४-२५ सालचा अर्थसंकल्प सादर करताना व्यक्त केली.

मात्र, हा प्रकल्प पूर्ण करण्याचा कर्नाटक सरकारचा निर्धार ठाम असल्याचे त्यांनी बोलून दाखविले. त्यांनी विधानसभेत सांगितले, की कळसा-भांडुरा नाला वळण प्रकल्पांतर्गत ३.९ अब्ज घनफूट (टीएमसी) पाणी वापरण्यासाठी केंद्रीय जल आयोगाने सविस्तर प्रकल्प अहवालास मंजुरी दिली.

कर्नाटक सरकारने राष्ट्रीय वन्यजीव मंडळाकडून वन मंजुरीच्या अपेक्षेने निविदा प्रक्रिया सुरू केली होती. तथापि, केंद्रीय वन, पर्यावरण आणि हवामान बदल मंत्री भूपेंद्र यादव यांच्या अध्यक्षतेखालील राष्ट्रीय वन्यजीव मंडळाच्या बैठकीत या प्रकल्पाचा वन मंजुरीसंदर्भातील निर्णय पुढे ढकलण्यात आला आहे.