पणजी: आठवी आणि दहावी उत्तीर्ण झाल्‍यानंतर मान्यताप्राप्त औद्योगिक प्रशिक्षण संस्थेच्‍या (आयटीआय) केंद्रातून एक वर्षाचा कोर्स आणि एक वर्षाचे प्रशिक्षणार्थी प्रशिक्षण पूर्ण केलेल्‍या विद्यार्थ्यांची शैक्षणिक पात्रता यापुढे अनुक्रमे दहावी आणि बारावीच्‍या समांतर दर्जाची असेल.

मुख्‍यमंत्र्यांची घोषणा

१. राज्‍यातील युवक-युवतींनी कौशल्‍याधारित शिक्षणावर भर द्यावा, यासाठी सरकारने गेल्‍या काही वर्षांपासून विविध मार्गांनी प्रयत्‍न सुरू केले आहेत.

२. ‘स्‍वयंपूर्ण गोवा २.०’ मध्‍येही सरकारने कौशल्‍य विकासाचा मुद्दा केंद्रस्‍थानी ठेवला होता.

३.सरकारी नोकरीच्‍या मागे न लागता विद्यार्थ्यांनी कौशल्‍य शिक्षण घेऊन स्‍वयंरोजगार थाटावेत किंवा खासगी क्षेत्रातील नोकऱ्या मिळवाव्‍यात, यासाठी आठवी आणि दहावी उत्तीर्ण झाल्‍यानंतर दोन वर्षे आयटीआय कोर्स करणाऱ्या विद्यार्थ्यांना अनुक्रमे दहावी आणि बारावी उत्तीर्ण दर्जा देण्‍यात येईल.

४.त्‍यांना बोर्डकडून तसे प्रमाणपत्रही देण्‍यात येईल. त्‍याचा उपयोग त्‍यांना नोकरी मिळवण्‍यासाठी तसेच शैक्षणिक गुणवत्ता वाढवण्‍यासाठीही होईल, अशी घोषणा मुख्‍यमंत्री डॉ. प्रमोद सावंत यांनी विधानसभेच्‍या पावसाळी अधिवेशनात केली होती.