पणजी: राज्‍यात रस्तासुरक्षेला चालना देणे, वाढत्‍या अपघातांवर नियंत्रण मिळविणे आणि मद्यपान करून वाहन चालवण्याच्या परिणामांबाबत चालकांमध्‍ये जागृती निर्माण करणे या हेतूने ‘डियाजिओ इंडिया’ आणि ‘भारत केअर्स’ यांच्या संयुक्त विद्यमाने तसेच गोवा वाहतूक विभागाच्या सहकार्याने ‘ड्रायव्हर सेन्सिटायझेशन टॅब लॅब’ या अभिनव उपक्रमाचे उद्‌घाटन करण्यात आले.

येथील प्रादेशिक परिवहन कार्यालयात झालेल्‍या या कार्यक्रमाला मुख्यमंत्री डॉ. प्रमोद सावंत प्रमुख पाहुणे म्‍हणून उपस्‍थित होते. हा उपक्रम डियाजिओ इंडियाच्या ‘राँग साईड ऑफ द रोड’ या मोहिमेचा एक महत्त्वपूर्ण भाग आहे.

नव्याने सुरू झालेल्या या टॅब लॅबमुळे ‘राँग साईड ऑफ द रोड’ आता गोव्यातील सात प्रादेशिक परिवहन केंद्रांमध्ये कार्यरत झाले आहे. डियाजिओ इंडियाच्या ‘स्पिरिट ऑफ प्रोग्रेस’ इएसजी अ‍ॅक्शन प्लॅनचा हा एक भाग आहे. या लॅबमध्ये चालकांना ४५ मिनिटांचे संवादात्मक व्हिडिओ मॉड्युल पाहावे लागते.

डियाजिओचे दीर्घकालीन उद्दिष्ट

‘डियाजिओ इंडिया’ २०३० पर्यंत १० लाखांहून अधिक लोकांमध्ये ‘ड्रिंक अँड ड्राईव्ह’संदर्भातील जागरूकता निर्माण करण्याचे उद्दिष्ट ठेवून काम करत आहे. या अनुषंगाने देशभरात ७० पेक्षा जास्त टॅब लॅब्स उभारण्याची योजना आहे.

डॉ. प्रमोद सावंत, मुख्यमंत्री

ही टॅब लॅब केवळ तांत्रिक सुविधा नसून रस्तेसुरक्षेसाठी उचललेले मोठे पाऊल आहे. ‘राँग साईड ऑफ द रोड’अंतर्गत दाखवले जाणारे मॉड्युल्स हे वाहनचालकांच्या चुकीच्या सवयी अधोरेखित करते आणि अशा सवयींचा गंभीर परिणाम किती घातक ठरू शकतो याचे प्रात्‍यक्षिक दाखविते. म्हणूनच ही फिल्म पाहणे लायसन्स प्रक्रियेचा अनिवार्य भाग आहे. यामुळे अपघातांची संख्या निश्‍चितच कमी होईल.