पणजी: नूतनीकरण करण्यात आलेल्या राज्य माहिती आयोगाच्या संकेतस्थळाचे अनावरण काल आयोगाच्या कार्यालयात मुख्य माहिती आयुक्त विश्‍वास सतरकर यांच्या हस्ते करण्यात आले. त्यांच्यासमवेत राज्य माहिती आयुक्त संजय ढवळीकर, सचिव विनेश आर्लेकर, अवर सचिव शशांक ठाकूर उपस्थित होते.

संकेतस्थळाचे अनावरण केल्‍यानंतर श्री. सतरकर म्हणाले, कोविडच्या महामारीत आयोगाचे कामकाज पूर्णतः तहकूब झाले होते. पण, आता सर्व कामे मार्गस्‍थ झाली आहेत. 12 तारखेला लोकायुक्त निवृत्त न्यायाधीश अंबादास जोशी यांच्या उपस्थितीत एका परिसंवादाचे आयोजनदेखील आयोगाने केले होते. सार्वजनिक माहिती अधिकाऱ्यांसाठी प्रशिक्षण शिबिराचे आयोजनही त्याचाच भाग होता.

माहिती आयुक्त संजय ढवळीकर म्हणाले, संकेतस्थळावर सर्वसामान्यांना आवश्‍यक माहिती उपलब्ध करून देण्यात आली आहे. यापूर्वी अनेक कार्यालयांतून ती उपलब्ध होत नव्हती. माहिती आयोग हा सर्वसामान्यांना न्याय देण्यासाठी नेहमीच तत्पर आहे. त्या अनुषंगाने राज्यातील प्रत्येक माणसाला प्रत्येक खात्याची माहिती मिळावी यासाठीचे नियोजन संकेतस्थळाच्या माध्यमातून केले आहे.

वर्षभरात 124 प्रकरणे निकालात

राज्यात माहिती अधिकाराखालील सुमारे 350 प्रकरणे अद्यापही प्रलंबित आहेत. कोविड महामारीचा प्रभाव कमी झाल्यानंतर आयोगाने 124 प्रकरणे निकालात काढल्‍याची माहिती यावेळी विश्‍‍वास सतरकर यांनी दिली. कलम 4 च्या अंमलबजावणीसाठी आम्ही आग्रही असल्याचे ते म्हणाले. या कलमानुसार सर्व शासकीय खाती त्यांच्याकडील माहिती सार्वत्रिक करण्यास बांधील आहेत.