काणकोण: श्रीस्थळ औद्योगिक वसाहतीतील त्या वादग्रस्त टाकीतील मळी जमिनीत खड्डा काढून पुरण्याचा प्रयत्न कंपनीने केल्यानंतर येथील पर्यावरणवाद्यांनी त्याला तीव्र आक्षेप घेतला आहे.

ही मळी सुमारे वीस वर्षे एका महाकाय टाकीत साठवून ठेवली होती. एका महिन्यापूर्वी या टाकीला गळती लागली होती. कोणत्याही क्षणी ही टाकी फुटण्याची शक्यता व्यक्त करून येथील रहिवाशांनी काणकोणचे उपजिल्हाधिकारी प्रतापराव नाईक गावकर यांना आपत्कालीन व्यवस्थापनाअंतर्गत कारवाई करण्याची मागणी केली होती. त्यानुसार ती मळी काढून नेण्यासाठी परवानगी देण्यात आली होती. मात्र, कंपनीने ही मळी जमिनीत खड्डा खणून गाडण्यास सुरवात केली. यामुळे भूजल प्रदूषित होण्याची शक्यता आहे, त्याचबरोबर येथील जैवसंपदेवर परिणाम होणार असल्याचे श्रीस्थळ जैवविविधता (Biodiversity) समितीचे अध्यक्ष विनय तुबकी व सदस्य शिरीष पै यांनी सांगितले.

या कंपनीच्या व्यवस्थापकांकडून मळीची तपासणी करण्यासाठी जमिनीत खड्डा खणून ती सोडण्यात आल्याचे सांगण्यात आले. श्रीस्थळ औद्योगिक वसाहतीतील अधिकारी संकेत फळदेसाई यांच्या माहितीप्रमाणे कंपनीला मळीची वाहतूक करण्यासाठी परवानगी देण्यात आली आहे.

दरम्यान, या कृतीची माहिती मिळताच उपजिल्हाधिकारी प्रतापराव नाईक गावकर यांनी औद्योगिक ‌वसाहतीला भेट देऊन मळी खड्डा खणून सोडण्यात येत असल्याची पाहणी केली व त्वरित कारवाई करण्याचे आश्वासन रहिवाशांना दिले. त्याचप्रमाणे कला व संस्कृती मंत्री रमेश तवडकर (Ramesh Tawadkar) यांनी भेट देऊन पाहणी केली व अधिकाऱ्यांना कारवाई करण्याचे निर्देश दिले. उपजिल्हाधिकारी प्रतापराव नाईक गावकर यांनी पोलिस निरीक्षक हरीश राऊत देसाई यांना मळी खड्डा खणून गाडण्यास जबाबदार असलेल्या कंपनीविरुद्ध गुन्हा दाखल करण्याची सूचना केली.

जैवसंपदा व बागायतीचे होणार नुकसान

प्रदूषणकारी मळी जमिनीत गाडल्यास त्याचा विपरित परिणाम येथील जैवसंपदा व या टाकीच्या खालच्या बाजूला असलेल्या आपल्या बागायतींवर होणार असल्याचे सोमदत्त देशमुख यांनी सांगितले. यापूर्वी येथील मळी आपल्या बागायतीत जाऊन माड करपले होते. गेले पाच दिवस येथे खड्डा खणून मळी सोडण्याचे काम सुरू होते. त्याठिकाणी फायर ब्रिगेडचे वाहन सकाळ-संध्याकाळ कार्यरत होते. त्यामुळे शासनाच्या संगनमताने हे काम सुरू होते, असे म्हणण्यास वाव असल्याचे त्यांनी सांगितले.

कंपनीच्या ठेकेदाराच्या माहितीप्रमाणे, या महाकाय टाकीत दीड हजार टँकर मळी आहे. यावेळी नगरसेवक शुभम कोमरपंत यांनी या मळीची सुरक्षितरीत्या वाहतूक करण्याची मागणी केली. मात्र, पंचायतीला अंधारात ठेवून हे काम सुरू होते, असे पंचायतीच्या सरपंच सेजल गावकर यांनी सांगितले.