Illegal Construction In Goa: एका बाजूने मांद्रेचे आमदार जीत आरोलकर हे रस्ता रुंदीकरण करण्यासाठी प्रयत्नशील आहेत.

तर दुसऱ्या बाजूने बिगर गोमंतकीय नागरिक ‘सीआरझेड’चे उल्लंघन करून रस्त्याच्या बाजूला आणि देवस्थान स्थळाला टेकूनच बेकायदेशीर बांधकामे करत असल्याची तक्रार स्थानिक युवक संदेश सावंत यांनी संबंधित खात्याला दिलेली आहे.

मांद्रे पंचायत क्षेत्रातील नारोबा देवस्थान परिसरात आणि समुद्राच्या भरती रेषेपासून काही अंतरावरच सीआरझेड कायद्याचे उल्लंघन करून बेकायदेशीरपणे बांधकाम केले जात आहे.

त्यांच्यावर कडक कारवाई करावी, अशी तक्रार लेखी स्वरूपात संदेश सावंत यांनी दिली. जर सरकारने या बांधकामावर कायदेशीर कारवाई केली नाही, तर आपण पंचायत कार्यालयासमोर उपोषणाला बसून आंदोलन करण्याचाही इशारा यावेळी तक्रारदार संदेश सावंत यांनी दिला.

संदेश सावंत यांनी सांगितले की या बेकायदेशीर बांधकामांमध्ये माजी सरपंचाचा हात आहे.

मागच्या वेळी नारोबा देवस्थानच्या जवळ असेच बांधकाम करण्याचा प्रयत्न सुरू होता, त्यावेळी याच माजी सरपंचांनी ते बांधकाम बंद पाडले होते. त्यामुळे आता परत हे बांधकाम कसे काय सुरू केले, असा प्रश्‍न उपस्थित होतो.

रस्त्याच्या बाजूला टेकून हे बांधकाम होत असल्याने पहिला मजला तयार झाल्यानंतर त्याचे पाणी थेट रस्त्यावर येईल.

दर पंधरा दिवसांनी पंचायतीच्या तलाठ्यांनी सीआरझेड विभागामध्ये जर बेकायदेशीर बांधकाम होत असेल तर त्याचा सर्व्हे करून तसा अहवाल पुढील कार्यवाहीसाठी पाठवणे गरजेचे आहे.

- संदेश सावंत, स्थानिक