Goa Electric Bus

पणजी: आज राज्यात शाश्वत वाहतूक व्यवस्थेची गरज आहे आणि ती पूर्ण करण्यासाठी सरकार सर्वतोपरी प्रयत्न करत आहेत. गोव्याला आयआयटी माजी विद्यार्थी परिषदेद्वारे ‘सीएसआर’अंतर्गत ७०० कोटी रुपयांच्या ५०० विजेवरील बसेस मिळणार असल्याने राज्यातील तिजोरीवर कुठलाच दबाव येणार नाही आणि आम्हाला उत्कृष्ट सेवा मिळेल, अशी माहिती वाहतूकमंत्री माविन गुदिन्हो यांनी दिली.

मंत्री गुदिन्हो यांनी सांगितले की, आम्हाला लोकांना सेवा द्यायची आहे. मुख्य सचिवांनी परिषदेला ‘सीएसआर’अंतर्गत बसेस देण्याची विनंती केल्यावर त्याची दखल घेऊन एका महिन्याच्या आत आम्हाला त्यांचा प्रतिसाद लाभला. लगेच त्यांची प्रतिक्रिया आल्यावर मंत्रिमंडळात यावर चर्चा झाली. यावरून सरकार वाहतूक विषयावर किती गांभीर्याने विचार करते, हे लक्षात येते.

५०० बसेस कधीपर्यंत मिळणार हे मात्र मंत्री गुदिन्हो यांनी दिली नाही. ते म्हणाले की, वेळ अजून ठरलेली नाही; परंतु आम्ही लवकरात लवकर कागदोपत्री व्यवहार पूर्ण करणार आहोत. या बसेस आल्यावर त्या कदंब वाहतूक महामंडळाकडे सुपूर्द करण्यात येतील.

गुदिन्हो यांनी दिलेल्या माहितीनुसार, बसेस लवकर मिळाव्यात आणि व्यवहार सुरळीत व्हावा, यासाठी विशेष मंडळाची स्थापना करण्यात येणार आहे. या मंडळामध्ये ४ सदस्य परिषदेचे असणार आहेत, तर ४ सदस्य वाहतूक विभागातील अधिकारी असणार आहेत.

राज्यात चार्जिंग स्टेशन्स उभारणार

‘सीएसआर’अंतर्गत ५०० विजेवरील बसेस राज्याला मिळणार आहेत. त्यासोबतच चार्जिंग स्टेशन देखील उभारले जाणार आहेत. आम्हाला सर्व सोयी मोफत मिळणार आहेत. यापुढे देखील अशाच प्रकारे सीएसआर अंतर्गत परिषद आम्हाला सहकार्य करील, अशी आशा मंत्री गुदिन्हो यांनी व्यक्त केली.