मडगाव: लोकशाहीत दुसऱ्या पक्षाच्या धोरणांना विरोध करण्याचा अधिकार सर्वानाच आहे. पण आमदारांच्या घरावर मोर्चा नेऊन राडा करण्याचा अधिकार कुणालाही नाही. जर आप पक्षाने (Aam Aadmi Party) असेच हातघाईचे राजकारण केल्यास त्याना आम्ही जशास तसे उत्तर देऊ असा इशारा भाजपचे प्रवक्ते दामू नाईक (BJP spokesperson Damu Naik) यांनी आज दिला.

नुवेचे आमदार विल्फ्रेड (बाबाशान) डीसा (Wilfred Deesa) यांच्या घरावर आपच्या उपाध्यक्ष प्रतिमा कुतीन्हो (Pratima Coutinho) यांनी मोर्चा आणल्यावर जो हंगामा झाला त्यावर सध्या गोव्यात उलटसुलट चर्चा चालू असताना आज भाजपने पलटवार केला. प्रदेश समितीचे सरचिटणीस नरेंद्र सावईकर यांनी आपच्या या मोर्चाचा निषेध करताना, आप गोव्यात घाणेरडी राजकीय संस्कृती आणू पाहत आहे. त्यांचे हे प्रकार आम्ही खपवून घेऊ या भ्रमात त्यांनी राहू नये, त्यांना त्यांच्याच भाषेत उत्तर देण्याची ताकद आमच्यामध्ये आहे असे ते म्हणाले.

काँग्रेसचे 10 आमदार भाजपात येणे ही त्यावेळची गरज होती. गोव्यात माजलेला भ्रष्टाचार निपटून काढण्यासाठी आणि गोवा विकायला निघालेल्या काही मंत्र्यांना वेसण घालण्यासाठी त्या असमदारांना भाजपात सामावून घेणे गरजेचे होते. आपल्या मतदारसंघाचा विकास करण्यासाठी ते भाजपात आले होते असे नाईक यांनी सांगितले. त्या आमदारांनी घेतलेला निर्णय योग्य की अयोग्य याचा निर्णय त्या त्या मतदारसंघातील मतदार घेतील. त्यात आपला नाक खुपसण्याची गरज नाही असे नाईक म्हणाले.