2002 पासून मी  भाजपचा सच्चा कार्यकर्ता आहे अगदी तळागाळापासून काम करीत येथपर्यंत आलेलो आहे. मंत्री मायकल लोबो (Minister Michael Lobo) यांच्याशी माझा वैयक्तिक वाद निर्माण झालेला असल्याने  स्वाभिमानी कळंगुटकर  या नात्याने  पुन्हां त्यांच्याशी जुळवून घेणे अथवा एकत्रित येणे आता शक्य होणार नाही त्यामुळे भाजपच्या वरिष्ठांनी येत्या विधानसभा निवडणुकीसाठी कळंगुटातून माझा विचार केल्यास मी मंत्री लोबो यांच्या विरोधात लढा देण्यास सक्षम असल्याचे प्रतिपादन कळंगुटचे पंच सदस्य तथा भाजपचे निष्ठावंत सुदेश मयेंकर (Sudesh Mayenkar) यांनी कळंगुटात सांगितले.

दरम्यान, भाजपच्या कळंगुट गोटात सर्वकाही ठीकठाक चाललेले असतांना मी पुढाकार घेत केशव सेवा साधना तर्फे कोवीड बाधितांच्या सोयीसाठी कोवीड सेंटर सुरु केले हीच गोष्ट मंत्री लोबो यांना खटकली, या गोष्टीवरुन त्यांनी प्रत्यक्ष तसेच अप्रत्यरित्या मला वेळोवेळी दुखावण्याचा प्रयत्न केला परंतु मी एक सच्चा भाजप कार्यकर्ता असल्याने त्या गोष्टीकडे कानाडोळा केला.

सरतेशेवटी माझ्या विरोधात खतांच्या वाटपावरून पोलिस तक्रार दाखल करण्यात आली आणी आमच्यातील संबंध अधिकच ताणले गेले आता पुन्हा एकत्रित येणे शक्य नाही असे मयेंकर यांनी सांगितले. माझ्या आतापर्यतच्या  कार्याची माहिती भाजपचे जेष्ठ सतीश धोंड तसेच मुख्यमंत्री डॉ. प्रमोद सावंत यांना बर्यापैकी आहे त्यामुळे येत्या विधानसभा निवडणुकीत कऴगुटातून भाजपच्या तिकीटावर लढण्याची संधी मिळाल्यास  मायकल लोबो यांच्यासमोर दोन हात करण्यास मी सक्षम आणी समर्थ असल्याचे सुदेश मयेंकर यांनी दै. गोमंतकशी बोलतांना निक्षून सांगितले.....