Goa Assembly Monsoon Session: राष्ट्रीय महामार्ग ४ अ पणजी-मोले-बेळगाव यावरील प्रस्तावित रस्ता रुंदीकरणांमध्ये भोमा आणि खोर्ली या गावातील प्रत्येकी ४ घरे बाधित होत असून या घरमालकांच्या पुनर्वसनासाठी भूसंपादन आणि भूखंड प्रस्तावित केले आहेत.

या रस्ता रुंदीकरणामध्ये मंदिरे पाडली जाणार नाहीत, अशी माहिती सार्वजनिक बांधकाम खात्याचे मंत्री नीलेश काब्राल यांनी मंगळवारी (ता.८) सभागृहात दिली.

वीरेश बोरकर, युरी आलेमाव, एल्टन डिकॉस्टा आणि व्हेंझी व्हिएगस यांनी ही लक्षवेधी मांडली. या प्रस्तावित रस्ता रुंदीकरणामुळे या दोन्ही गावांमधील मोठ्या प्रमाणात घरे आणि मंदिरे पाडली जातील, अशी भीती व्यक्त केली होती, यावर मंत्री काब्राल बोलत होते.

एकूण 22 बांधकामांचा ठरतोय अडथळा

1. काब्राल म्हणाले, भोमा गावातील सध्याच्या महामार्गाच्या डाव्या काठावर जेथे मंदिरे नाहीत तिथून हे रुंदीकरण करण्यात येणार आहे. यामुळे एकूण २२ वास्तू बाधित आहेत. त्यापैकी केवळ ४ निवासी घरे आहेत. उर्वरित तात्पुरती बांधकामे आहेत.

2. खोर्ली गावात ३९ बांधकामे बाधित आहेत. त्यापैकी ४ जुनी निवासी घरे आहेत. यातील अनेक बांधकामे बेकायदेशीर आहेत. तरीही भोमा गावासमोरील बाधित दुकाने आणि इतर बांधकामाचे पुनर्वसन करण्याचा सरकारचा मानस आहे.

मंदिराच्या परिसरात, उजव्या बाजूच्या बाधित ४ घरांच्या पुनर्वसनासाठी भूसंपादन आणि भूखंड प्रस्तावित आहे. खोर्ली गावातील ४ घरांच्या पुनर्वसनासाठी दुसऱ्या ठिकाणी स्वतंत्र भूखंडांची तरतूद आहे.

यावेळी स्वतंत्र पूल उभारून रस्ते करण्यात येणार आहेत. त्यामुळे पुलाखालील परिसरही नागरिकांना वापरता येणार आहे. याशिवाय नागरिकांच्या उपजीविकेची कोणतीच साधने यामुळे नष्ट होणार नाहीत. - नीलेश काब्राल, सार्वजनिक बांधकाममंत्री