मडगाव: गोव्याचे आरोग्यमंत्री विश्वजित राणे यांनी शनिवारी (दि.१ मार्च) राज्यातील लोकांच्या आरोग्याची हेळसांड करणाऱ्या रेस्टॉरंट आणि औषध दुकानांवर धडक कारवाई करणार असल्याची घोषणा केलीये. मडगाव येथे पत्रकारांशी बोलताना राणे यांनी अन्न आणि औषध प्रशासनाच्या माध्यमातून राज्यात अन्न आणि औषधांची सुरक्षितता सुनिश्चित करण्याचे प्रयत्न सुरू असल्याची माहिती दिली.

आरोग्यमंत्री राणे यांनी सांगितले की, FDA अधिकाऱ्यांनी कृत्रिमरित्या पिकवलेली फळे विकणाऱ्या आस्थापनांवर छापे टाकण्यास सुरुवात केली आहे आणि अन्न सुरक्षिततेवर लक्ष ठेवण्यासाठी यांचे काही नमुनेही तपासणीसाठी घेतले जात आहेत. "राज्यात विकले जाणारे अन्न सुरक्षित असावे यासाठी आम्ही कायम प्रयत्न करत राहू" असे राणे म्हणाले आणि व्यावसायिकांनी सुरक्षित अन्न तयार करत नियमांचे पालन करावे असे आवाहन त्यांनी केले आहे. याशिवाय, राणे यांनी राज्यातील रेस्टॉरंट्समध्ये ग्राहकांसाठी RO शुद्ध केलेले पाणी देण्यासह स्वच्छता नियमांचे पालन केले पाहिजे. अस्वच्छ परिस्थितीत चालणारे कोणतेही रेस्टॉरंट सहा महिन्यांसाठी तात्काळ बंद केले जाण्याचा इशाराही दिलाय.

औषध दुकानांवरही कारवाई

राज्यातील औषध दुकानांवरही कारवाई केली जाणार आहे. FDA अचानक छापे टाकून फार्मसी एक्सपायर झालेली औषधे विकत तर नाहीत याची खात्री करतील आणि नियमांचे उल्लंघन करणाऱ्यांवर गंभीर कारवाई केली जाईल.

ही कारवाई राज्य सरकारकडून केल्या जाणाऱ्या आरोग्याचे रक्षण करण्याच्या आणि व्यवसायांनी आवश्यक मानके पूर्ण करावीत यासाठी सुरू असलेल्या प्रयत्नांचा भाग आहेत असं आरोग्यमंत्री विश्वजीत राणे म्हणाले आहेत.

मी आणि मुख्यमंत्री एकाच पेजवर!

"मी आणि मुख्यमंत्री एकाच पेजवर आहोत. भारतीय जनता पार्टीतर्फे आम्हा दोघांकडून जनतेच्या हिताचे निर्णय घेतले जाणार आहेत. मला नर्सिंग कॉलेज हवे आहे आणि गोव्यासाठी अधिक जागा उपलब्ध झाल्या पाहिजेत. अंतिम निर्णय मी आणि मुख्यमंत्री सोबत घेऊ सर्व लोकांना विश्वासात घेऊन हिताचा निर्णय घेतला जाईल" अशी माहिती, आरोग्यमंत्री विश्वजित राणे यांनी दिली आहे.