पणजी: जीएसटी परिषदेच्‍या ५६व्‍या बैठकीत निश्‍चित झालेल्‍या दरांची सोमवारपासून (ता. २२) योग्‍य पद्धतीने अंमलबजावणी करावी. जे व्‍यापारी, दुकानदार या कमी झालेल्‍या नवीन दरांची अंमलबजावणी करणार नाहीत त्‍यांच्‍यावर कायदेशीर कारवाई करण्‍यात येईल, असे परिपत्रक राज्‍य कर खात्‍याने आज जारी केले.

काहीच दिवसांपूर्वी झालेल्‍या जीएसटी परिषदेच्‍या बैठकीत नागरिकांना दैनंदिन जीवनात लागणाऱ्या अनेक वस्‍तूंवरील जीएसटी कमी करण्‍याचा निर्णय घेण्‍यात आला होता. त्‍या निर्णयाची अंमलबजावणी गोव्‍यासह देशभर आजपासून करण्‍यात आली. सुधारीत दरांचा लाभ ग्राहकांपर्यंत पोहोचावा यासाठी राज्‍य कर खात्‍याने गोव्यातील व्यापारी संघटनांसह विविध भागधारकांशी समन्वय साधला आहे.

जीएसटी दरातील कपात आणि बचतीचे फायदे ग्राहकांना मिळावेत, यासाठी आवश्‍‍यक ती पावले उचलण्याचे आवाहन खात्‍याने व्यापारी आणि उद्योजकांना केले आहे.

शिवाय संबंधित अधिकाऱ्यांना जीएसटी सुधारणा सुरळीतपणे राबविण्यासाठी करदात्यांना पूर्ण सहकार्य करण्याचे तसेच रिटेल दुकानांना भेट देऊन नवीन दरांनुसार ग्राहकांना जीएसटी बचत दिली जात आहे की नाही, याची खात्री करण्याचे निर्देश दिले आहेत. या नियमांचे जे पालन करणार नाहीत, त्‍यांच्‍यावर कायदेशीर कारवाई करण्‍यात येईल, असे राज्‍य कर आयुक्त एस. एस. गिल यांनी परिपत्रकात म्‍हटले आहे.