Parking Issue: म्हापसा येथील नवीन केटीसी बस स्थानकावर पार्किंग शुल्काच्या वादातून सध्या मुबंईस्थित व मूळच्या कांदोळी येथील दाम्पत्यास मारहाण व शिवीगाळ केल्याप्रकरणी म्हापसा पोलिसांनी एकाला अटक केली. तर, दुसरा संशयित फरार आहे.

प्राप्त माहितीनुसार, याप्रकरणी म्हापसा पोलिसांनी संशयित रवी तलवार (23 , चंदनवाडी, बस्तोडा) याला अटक केली. डोमनिक लाएटो हे फिर्यादी आहेत. सदर घटना आज (ता.10) दुपारी घडली.

फिर्यादी हे आपल्या पत्नीसह येथील बस स्थानकाच्या पार्किंग तळावर आले होते. आपली चारचाकी पार्क करण्यासाठी त्यांनी पार्किंग अटेंडंटला सांगितले. त्याने थेट 50 रुपये सांगितले. मात्र, दर फलकावर 25 रुपये शुल्क असल्याचे फिर्यादींनी पार्किंग अटेंडंटला म्हटले. मात्र, पार्किंग अटेंडंटने त्यांचे ऐकले नाही व 50 रुपयेच द्यावे लागतील, असे सांगितले.

तसेच पार्किंग अटेंडंटने फिर्यादीस शिवीगाळ तसेच त्यांच्या चेहऱ्यावर मुठी मारल्या. यात ते जखमी झाले. तर संशयितांनी फिर्यादीच्या पत्नीसही शिवीगाळ केली.

याप्रकरणी म्हापसा पोलिसांनी संशयित रवी तलवार याला अटक केली. तर, त्याचा दुसरा साथीदार अविनाश हा सध्या फरार आहे. पोलिसांनी भारतीय दंड संहितेच्या कलम ५०४, ३५४(अ), ५०९, ३२४, ४२७, ५०६(२) व ३४ अंतर्गत गुन्हा नोंदवून संशयितास अटक केली.