Marriage Registration: गोवा सरकारने विवाह नोंदणी आणखी सोपी केली आहे. याबाबत विवाह नोंदणी विभागाने अधिसूचना जारी केली असुन, त्यानुसार ऑनलाइन नोंदणी करणाऱ्या नव दाम्पत्याला डिजिटल स्वाक्षरी करत आपले विवाह नोंदणी प्रमाणपत्र मिळवता येणार आहे.

(Goa govt has introduced the concept of digitally signed marriage certificate )

मिळालेल्या माहितीनुसार विवाह नोंदणी विभागाने सुचित केले आहे की, गोवा सरकारने ऑनलाइन विवाह नोंदणी सुरु केली आहे. यात क्यूआर कोड डिजिटल स्वाक्षरी केलेले विवाह प्रमाणपत्र संकल्पनेला कायदेशिर मान्यता दिली आहे. त्यानुसार नोंदणी केल्यास गोवा सरकारचे वॉटरमार्क असलेले विवाह प्रमाणपत्र मिळू शकणार आहे. तसेच संबंधित अधिकार क्षेत्रातील सिव्हिल रजिस्ट्रार यांनी डिजिटल स्वाक्षरी केलेले प्रमाणपत्र ही आता ग्राह्य मानले जाणार आहे.

नव्या बदलानुसार गोव्यात विवाह नोंदणी आता अधिक सोपी झाली आहे. कारण विवाह करणाऱ्या व्यक्तींना सही करण्यासाठी थेट विवाह नोंदणी कार्यालयात न जाता ती सुलभ ठिकाणावरुन ही करता येणे शक्य होणार आहे. त्यामुळे विवाह करणाऱ्या व्यक्ती नोंदणी कार्यालयात आपला अमुल्य वेळ खर्च न करता केवळ ऑनलाइन विवाह नोंदणी करत आपला वेळ वाचवू शकणार आहेत.