Manohar International Airport: गोव्यातील मोपा येथील नवीन मनोहर आंतरराष्ट्रीय विमानतळाच्या नावावरून अनेकदा गोंधळ केला जातो.

काही वेळा या विमानतळाचे नाव न्यू गोवा विमानतळ असे उच्चारले जाते. त्यावरून आता राज्य सरकारनेच विमानतळ कंपनीला याबाबत पत्र लिहिले आहे.

गोव्याच्या नागरी विमान उड्डाण खात्याने मोपा येथील मनोहर आंतरराष्ट्रीय विमानतळाचे व्यवस्थापन करणाऱ्या जीएमआर या विमानतळ कंपनीला पत्र लिहिले आहे.

या पत्रात म्हटले आहे की, पंतप्रधान नरेंद्र मोदी यांच्या हस्ते या विमानतळाचे नाव मनोहर आंतरराष्ट्रीय विमानतळ असे करण्यात आले आहे. त्यामुळे कंपनीने याच नावाचा उल्लेख नियमितपणे करावा. इतर कोणत्याही नावाने या विमानतळाला संबोधू नये.

मोपा येथील या ग्रीनफील्ड इंटरनॅशनल एअरपोर्टचे नामकरण पंतप्रधान नरेंद्र मोदींच्या उपस्थितीत 11 डिसेंबर 2022 रोजी मनोहर आंतरराष्ट्रीय विमानतळ असे करण्यात आले. या नावाला केंद्रीय मंत्रीमंडळ, राज्य मंत्रीमंडळानेही मंजुरी दिली.

राज्याच्या विधानसभेतही त्याबाबत प्रस्ताव मंजूर झाला. त्यामुळे फ्लाईट्स, सोशल मीडिया अनाऊन्समेंट, ब्रँडिंगमध्ये याच नावाचा वापर व्हावा, नावाच्या पुढे मागे काहीही जोडू नये, असे निर्देश दिले गेले.

तथापि, या विमानतळाला जीएमआर गोवा इंटरनॅशनल एअरपोर्ट लिमिटेड (GGIAL) कंपनीतर्फे विमानतळाचा उल्लेख न्यू गोवा असा केला जात होता. त्यामुळे न्यू गोवा असा उल्लेख करणे तत्काळ थांबवावे.

मनोहर आंतरराष्ट्रीय विमानतळ असाच उल्लेख सर्वत्र करण्यात यावा. 8 दिवसात याची अंमलबजावणी व्हावी, याबाबत काही तक्रार आढळून आल्यास त्याची गांभीर्याने दखल घेतली जाईल, असेही पत्रात म्हटले आहे.