पणजी: गोव्यात विदेशी पर्यटकांना आकर्षित करण्यासाठी राज्य सरकारने हालचाली सुरु केल्या आहेत. ठराविक देशातून येणाऱ्या पर्यटकांना 'व्हिसा ऑन अरायव्हल' सुरु करण्याची मागणी गोवा सरकार केंद्र सरकारकडे करणार आहे. राज्यात विदेशी पर्यटकांची संख्या घटल्यानंतर सरकारने पर्यटकांना आकर्षित करण्यासाठी उपाययोजना करण्याचा निर्णय घेतलाय.

केंद्राने डिजिटल नोमाड व्हिसा योजना सुरु करण्याबाबत आणि आंतरराष्ट्रीय पर्यटकांना आकर्षित करण्यासाठी विमानसेवा सुरु करण्याबाबत विचार करावा, अशी विनंती गोवा सरकार करणार आहे.

डिजिटल नोमाड व्हिसा विदेशी नागरिकांना एका ठराविक काळासाठी देशात राहण्यासह काम करण्याची मुभा देतो. गोवा पर्यटनाबाबत सोशल मिडियातून नकारात्मक सूर समोर आल्यानंतर आता राज्य सरकारने ठोस पाऊले उचलण्याचा निर्णय घेतला आहे. येत्या काही दिवसात सरकार याबाबतचा प्रस्ताव केंद्राकडे पाठवणार आहे.

गोव्या ऐवजी पर्यटक थायलंड, व्हिएतनाम, श्रीलंका यासारख्या देशांना पसंती देतायेत असा दावा सोशल मिडियावरुन करण्यात आला होता. गोव्यात येणाऱ्या अनेक पर्यटकांना पर्यटक व्हिसावर राज्यात काम करता येत नाही, त्यामुळे डिजिटल नोमाड व्हिसा सुरु करण्याची मागणी केली जात आहे. तसेच, विमानसेवा मिळाल्यास राज्यात येणाऱ्या पर्यटकांची संख्या वाढेल, असा दावा पर्यटन विभागाच्या वतीने करण्यात येत आहे.

पर्यटनासाठी प्रसिद्ध असणारे अनेक देश व्हिसा ऑन अरायव्हल सारखी सुविधा पुरवतात. अशा देशांसोबत स्पर्धा करायची असल्यास आपल्याला देखील पर्यटकांना ऑनलाईन पद्धतीने व्हिसा उपलब्ध करुन देण्याची सोय केली पाहिजे. यामुळे व्हिसा मिळण्यास लागणारा वेळ कमी होईल, असे तज्ञ सांगतात.

गोव्यात २०२४ साली एक कोटीहून अधिक पर्यटक दाखल झाले. यात ९९.४१ लाख देशी पर्यटक होते. २०२३ मध्ये हीच संख्या ८१.७५ लाख एवढी होती तर, एकूण पर्यटकांची संख्या ८६.२८ लाख एवढी होती, अशी माहिती गोवा पर्यटन खात्याने दिली आहे.