Goa News: सरकारने शॅक शुल्कात 50 टक्के सवलत द्यावी, अशी शॅक मालकांची अपेक्षा आहे. शॅक शुल्कात सवलत दिली जाईल, असे सरकारने सांगितले होते, त्याप्रमाणे शासनाने त्वरित कृती करावी. एक दोन दिवसात सरकारने सवलतीचा आदेश जारी केला नाही, तर पर्यटन संचालकांची भेट घेणार असल्याचे शॅक मालकांनी सांगितले.

काही दिवसांपूर्वी शॅक मालकांनी मुख्यमंत्री डॉ. सावंत यांची भेट घेऊन त्यांना शुल्कात सवलत देण्याची मागणी केली होती. शॅक मालक कल्याण सोसायटीचे अध्यक्ष क्रुझ कार्दोज म्हणाले, की जीएसटी व इतर करासह आणखी 10 टक्के जादा शुल्क भरण्यास सांगितले होते.

शिवाय शॅक मालकांना आणखी जादा 150 टक्के कचरा कर म्हणून भरणा करण्यास सांगितले होते. त्याप्रमाणे 50 टक्के शॅक मालकांनी हे शुल्क भरल्याचे क्रुझ कार्दोज यांनी सांगितले. काही जणांनी अजून शुल्क भरलेले नाही. शुल्क भरण्याची अंतिम तारीख 4 नोव्हेंबर आहे. मात्र त्यापूर्वी सरकार शुल्कात सवलत देईल, अशी त्यांची अपेक्षा आहे.