53rd IFFI Goa: कोविडनंतर इफ्फीत येण्यासाठी आंतरराष्ट्रीय स्तरावरील अभिनेते, निर्माते, दिग्दर्शक आतुर आहेत. हा महोत्सव आत्तापर्यंतच्या महोत्सवापेक्षाही वेगळा आणि आठवणीतील ठरू शकतो. या महोत्सवासाठी लागणाऱ्या पायाभूत सुविधा उभारण्याचे काम राज्य सरकारच्या मनोरंजन संस्थेच्यावतीने पूर्ण होत आले आहे. या महोत्सवासाठी 18 तारखेपासून राज्यात पाहुणे येण्यास प्रारंभ होईल, अशी माहिती मुख्यमंत्री डॉ. प्रमोद सावंत यांनी दिली.

इफ्फीच्या आयोजनाविषयी ठिकठिकाणच्या कामांची पाहणी मुख्यमंत्र्यांनी केली. ऑयनॉक्स परिसरात आल्यानंतर त्यांनी माध्यमांशी संवाद साधला. याप्रसंगी गोवा मनोरंजन संस्था (ईएसजी) मुख्य कार्यकारी अधिकारी स्वेतिका सचन, सरव्यवस्थापक मृणाल वाळके, ईएसजी संचालक शर्मद रायतूरकर, जिल्हाधिकारी मामू हागे, जिल्हा पोलिस अधीक्षक व इतर मान्यवरांची उपस्थिती होती.

मुख्यमंत्री म्हणाले, राष्ट्रीय चित्रपट विकास महामंडळाने (एनएफडीसी) यंदा फिल्म बझारचा एक भाग म्हणून युथ होस्टलच्या बाजूच्या जागेत वेगळी व्यवस्था केली आहे. याठिकाणी ज्यांनी नोंदणी केलेली नाही, अशा लोकांनाही जाता येईल. त्याशिवाय या महोत्सवात विविध कलाकारांचा सहभागही असणार आहे.

मनोरंजन संस्थेच्यावतीने ज्या पायाभूत सुविधा निर्माण करून द्यायच्या आहेत, त्या पूर्णत्वाकडे आल्या असून दोन-चार दिवसांत त्या पूर्ण होऊन आम्ही हा सर्व भाग एनएफडीसीकडे सुपूर्द करू, असेही त्यांनी सांगितले.

गोवा विभागात यंदा दहा लघुपट

इफ्फीतील गोवा (Goa) विभागात यंदा दहा लघुपट आणि एक चित्रपट मिळालेला आहे. भारतीय चित्रपटांची निवड जे ज्युरी मंडळ करते, त्यांच्याकडूनच गोव्यातील लघुपट व चित्रपटांची निवड करून घेतली जाते. इफ्फीचा गोव्यातील चित्रपट निर्मात्यांना फायदा व्हावा यासाठी चार वेगवेगळ्या विषयांवर मास्टर क्लास ठेवलेले आहेत.

तेही खास करून गोव्यातील चित्रपट निर्मात्यांसाठी आहेत. त्यातून चित्रीकरण, स्क्रिप्ट रायटिंग, निर्देशन, अभिनय अशा विषयांवर 23 ते 26 तारखांना हे क्लास होणार आहेत. राज्यातील चित्रपटसृष्टीशी निगडित असलेल्यांनी या क्लासना उपस्थित रहावे, असे आवाहन रायतूरकर यांनी केले.