Goa News: कृषीप्रधान गोव्यात युवा पिढीने विशेष रुची दाखवताना आधुनिक तंत्रज्ञानाचा अवलंब करून प्राकृतिक सेंद्रिय शेतीवर भर देण्याची गरज आहे. फार्मर्स कंपनीच्या माध्यमातून अनेक बाबतीत शेतकरी वर्गाला मोठी उपलब्धी गाठणे शक्य होईल, असा विश्‍वास मुख्यमंत्री डॉ. प्रमोद सावंत यांनी काल व्यक्त केला.

केंद्र व राज्य सरकारच्या सहकार्याने राज्यातील पहिल्या बिचोलिम प्रोग्रेसिव्ह फार्मर्स प्रोड्युसर कंपनी लिमिटेडचे मार्केट यार्ड साखळी येथे उद्‍घाटन करण्यात आले. यानंतर रवींद्र भवनात आयोजित कार्यक्रमात मुख्यमंत्री बोलत होते. यावेळी डिचोलीचे आमदार डॉ. चंद्रकांत शेट्ये, मयेचे आमदार प्रेमेंद्र शेट, कृषी खात्याचे संचालक नेव्हिल अल्फान्सो, कंपनीचे संचालक विश्‍वंभर गावस आदी उपस्थित होते.

‘राज्यात बारा शेतकरी कंपनी स्थापन करून नव्या योजना हाती घेण्यामागे प्रत्येकाने आत्मनिर्भर व्हावे हा उद्देश आहे. गोवा नैसर्गिक शेतीसाठी प्रसिद्ध आहे. शेणखत व इतर सेंद्रिय खते, प्राकृतिक आणि समूह शेतीच्या माध्यमातून अनेक उद्दिष्ठे साध्य करत शेती व्यवसायात क्रांती घडवणे शक्य आहे’, असेही मुख्यमंत्री म्हणाले.

गोवन ब्रॅण्ड अंतर्गत अनेक उत्पादने तयार होत आहेत. कुणबी साडी उत्पादन राज्यात सुरू केले असून देशपातळीवर मोठी मागणी आहे. नव्या योजनांसह तरुणाईचा सहभाग वाढला तर शेती व्यवसायाला मोठी गती मिळणे शक्य आहे. प्रत्येकाने शेतीत रुची दाखवावी, असे आवाहन आमदार डॉ शेट्ये यांनी केले.