Goa News: घरपट्टी, व्यापारी तसेच प्रकारचा कर ज्यांनी ग्रामपंचायतींमध्ये भरलेला नाही, त्यांना कोणतेही दाखले द्यावयाचे नाही, असे सरकारने ठरविले आहे. राज्‍यातील 191 पंचायतींची करापोटी किती वसुली बाकी आहे, ते शोधण्याचे काम पंचायत खात्याने सुरू केले आहे.

मात्र कोणत्‍याही परिस्‍थितीत कर न भरणाऱ्यांना कोणताही दाखला देऊ नका, असे स्‍पष्‍ट निर्देश पंचायतमंत्री माविन गुदिन्हो यांनी पंचायतीना दिले आहेत. बोगमाळो-चिकोळणा पंचायतीला नुकतीच भेट देऊन गुदिन्‍हो यांनी सरपंच संकल्प महाले, उपसरपंच लोरिना डिकुन्हा व इतर पंचांशी चर्चा केली. तसेच तेथील आर्थिक परिस्थितीचा आढावा घेतला.

दक्षिण गोवा पंचायत महिला सशक्तीकरण अभियान आणि पॅरिश कौन्सिल ऑफ बोगमाळो यांच्या वतीने आयोजित मोफत नेत्रतपासणी शिबिरात त्यांनी गरजूंना चष्म्यांचे वाटप केले. ज्यांनी पंचायतीचे कर थकविले आहेत, त्यांना शुल्क भरायला सांगा आणि नंतरच दाखले द्या, असा कानमंत्र गुदिन्हो यांनी दिला आहे.