Goa Mine Project: राज्यातील खनिज खाणी सुरु होत असतील, तर त्याचे कामगारांकडून स्वागतच करण्यात येत आहे. मात्र, या खाणींवर जे कामगार कामावर आहेत, त्यांच्या रोजगाराला कोणताच धक्का लागता कामा नये. या कामगारांना आहे त्याच खाण कंपन्यांत पुन्हा कामावर घेणे आवश्‍यक असून तशी कामगार संघटनेची मागणी आहे.

त्यामुळे सरकारने लिलाव करून जरी खाणी सुरू केल्या तरी आधीच्या कामगारांचे हित जपावे, असे स्पष्ट मत कामगार नेते पुती गावकर यांनी व्यक्त केले. फोंड्यात काल बोलावण्यात आलेल्या पत्रकार परिषदेत पुती गावकर यांनी खाण कामगारांची व्यथा मांडली.

गोवा डेअरीच्या अनागोंदी कारभारावर बोट ठेवताना पुती गावकर यांनी कामगार जादा झाले म्हणून कामगारांना काढून टाकणे गैर असून जे कामगार गेली सात दे दहा वर्षे गोवा डेअरीत कामाला आहेत, त्यांना कामावरून काढून टाकणे म्हणजे कामगारहिताच्या विरुद्ध संचालकांचे वर्तन आहे.

गोवा डेअरीत उत्पादन विभागात असलेल्या कामगारांची सातत्याने आवश्‍यकता आहे. येथील कामगार निवृत्त झाल्यामुळेच या लोकांना घेण्यात आले. मात्र, आता बत्तीस कामगारांना काढून टाकण्याचे षड्‌यंत्र सुरु असून असा प्रकार खपवून घेतला जाणार नाही, असे पुती गावकर यांनी सांगितले.

किमान वेतन लागू करावे

खाण कामगारांचे हित जपताना त्यांना त्यांची रोजीरोटी व्यवस्थित मिळाली पाहिजे. गोव्यात येणाऱ्या देशी-विदेशी पर्यटकांमुळे येथील राहणीमान महागडे झाले असून त्याची झळ गोमंतकीयांना बसत आहे.

त्यातुलनेत एखाद्या आस्थापनात कामाला असलेल्या गोमंतकीय कामगाराला किमान वेतन मिळत नाही, त्यासाठी विद्यमान कामगारमंत्री बाबूश मोन्सेरात यांनी जाहीर केल्याप्रमाणे कामगारांचे हित जपताना त्यांना किमान वेतन लागू करावे, असे पुती गावकर म्हणाले.