Goa government museum development scheme

पणजी: गोवा सरकारने राज्यातील वस्तु संग्रहालयांमध्ये वृद्धी व्हावी, त्यांचे योग्य संगोपन व्हावे यादृष्टीने नवीन वस्तुसंग्रहालये उभारणीसाठी तसेच जी वस्तुसंग्रहालये आहेत त्यांच्या साधनसुविधांसाठी संग्रहालय संचालनालयाने नवी योजना आणली असून या योजनेतून संस्थांना प्रत्येकी ५ लाख रूपये मिळतील, असे अधिसूचित करण्यात आले आहे.

राज्यातील नोंदणीकृत असलेल्या खासगी संग्रहालयांना देखील या योजनेचा लाभ घेता येणार आहे. ज्या संस्थांची किंवा ज्यांची वैयक्तिक अशी पुरातन वास्तू, अंकशास्त्र, चित्रे, लोककला, हस्तलिखिते इतर कोणतीही संग्रहालये ज्यातून गोव्याचा इतिहास, जीवन किंवा संस्कृती, प्रतिबिंबित होते किंवा एखादी अनोखी संकल्पना जी सरकारच्या परवानगीने राबविण्यात येईल, अशा संग्रहालयांना या योजनेचा लाभ घेता येणार.

हे अर्थ सहाय्य दोन विभागात देण्यात येणार आहेत. ज्यात जुन्या संग्रहालयाच्या साधनसुविधा विकासासाठी प्रत्येकी ५ लाख रूपये तसेच नव्या संग्रहालयाच्या उभारणीसाठी ५ लाख रूपये,अशी तरतूद करण्यात आली आहे. परंतु यासंबंधीचे नियम व अटींचाही संबंधित संग्रहालयाला पाठपुरावा करावा लागणार आहे.

तज्ज्ञ समिती करणार अर्जांची छाननी

या योजनेचा लाभ घेण्यासाठी नोंदणीकृत संग्राहलयांना प्रस्ताव सादर करावा लागेल. त्यानंतर तज्ञ समिती नेमून ते समिती प्रस्ताव किंवा अर्जांची छाननी करून प्रतिवर्षी दोन्ही विभागात प्रत्येकी एका संग्रहालयाची निवड करण्यात येईल, तसेच या योजनेतून एका संग्रहालयाला केवळ एकाचवेळी या योजनेचा लाभ घेता येणार असल्याचे अधिसूचित करण्यात आले आहे.