पणजी: पाच महिन्यांचे लेखानुदान राज्य सरकारने आज विधानसभेत मंजूर करून घेतले. मात्र, या विधेयकावर बोलू दिले नाही म्हणून विरोधी आमदारांनी सभापतींसमोरील हौद्यात धाव घेत जोरदार घोषणाबाजी केली.

या गदारोळातच मुख्यमंत्री डॉ. प्रमोद सावंत यांनी हे विधेयक मांडण्यासाठी परवानगी मागितली. विधेयक सादर केले, विधेयक विचारात घेण्याची विनंती केली आणि विधेयक मंजूर करण्यासाठी सादर केले. हे सारे होत असताना विरोधी पक्षनेते युरी आलेमाव आणि आमदार विजय सरदेसाई यांनी, आम्हाला यावर बोलायचे आहे, असे सांगितले.

सुरुवातीला मुख्यमंत्र्यांनी त्यांना एकेक मिनिटात बोलण्यास देता येईल, अशी भूमिका घेतली. नंतर मात्र त्यांनी थेट विधेयक विचारात घेण्याची विनंती केली. विरोधी पक्षनेत्याला कधीही बोलण्याचा अधिकार असतो, याची आठवण आलेमाव यांनी करून दिली.

मात्र, सभापतींनी पुढील कामकाज पुकारणे सुरूच ठेवले. त्यावेळी सरदेसाई यांनी सभापतींच्या हौद्याकडे धाव घेतली. त्यांच्यापाठोपाठ आलेमाव, एल्टन डिकॉस्ता, वेंझी व्हिएगस, क्रुझ सिल्वा आणि वीरेश बोरकरही हौद्याकडे आले. त्याच गदारोळात लेखानुदान मंजूर झाले आणि सभापतींनी समारोपाचे भाषणही सुरू केले.