Ganesh Chaturthi 2023 तमाम गणेशभक्तांना आता गणेश चतुर्थीचे वेध लागले असून, सध्या डिचोलीतील विविध भागातील चित्रशाळांमधून गणपतीच्या मूर्ती घडविण्याची लगबग सुरू झाली आहे. मूर्तीकारांचे हात कामाला लागले आहेत. विविध चित्रशाळांमधून रात्री जागून गणपतीच्या मूर्ती आकारही घेऊ लागल्या आहेत.

चिकण माती चित्रशाळेपर्यंत पोचविण्याचा खर्च आणि वाढत्या महागाईमुळे यंदा गणपतीच्या मूर्तीचे दर किंचित वाढण्याचे संकेत आहेत. तरीदेखील राज्यात प्लास्टर ऑफ पॅरिसच्या मूर्तीचे आक्रमण ही मूर्तीकारांसाठी चिंतेची बाब बनली आहे.

बालगोपाळांचा आनंद द्विगुणित करणाऱ्या आणि हिंदूंचा मोठा धार्मिक सण असलेल्या चतुर्थीचे गणेश चतुर्थी यंदा सप्टेंबर महिन्याच्या १९ तारखेला साजरी होणार आहे.

डिचोलीतील काही चित्रशाळांमधून मूर्तीकार मूर्ती कामांसाठी आपल्या कुटुंबातील सदस्यांची मदत घेत आहेत. या कामात महिलांही आघाडीवर असल्याचे दिसून येत आहे. कुंभारवाडा-मये येथील एक मूर्तीकार कालिदास शेट यांना तर मुलां-बाळांसह त्यांची सहचारिणी करुणा शेट मूर्तीकामात मदत करीत आहेत.

काही चित्रशाळांमधून राज्याबाहेरील कुशल कारागिरांची मदत घेण्यात येते. यंदाही बहुतेक चित्रशाळांमध्ये राज्याबाहेरील कारागीर उपलब्ध झाले आहेत. कारागिरांच्या मदतीने काही चित्रशाळांमधून दिवसरात्र गणेशमूर्ती बनविण्याचे काम सुरू असल्याचे दिसून येत आहे.

प्लास्टर ऑफ पॅरिसच्या मूर्ती नको!

बंदी असताना आणि स्थानिक मूर्तीकारांचा विरोध असतानाही गेल्या काही वर्षांपासून प्लास्टर ऑफ पॅरिसच्या मूर्तीनी राज्यात आक्रमण केले आहे. शाडू मातीच्या मूर्ती असल्याचे सांगून प्लास्टर ऑफ पॅरिसच्या मूर्तीची विक्री होत असते.

या मूर्ती दिसायला सुबक आणि वजनाने हलक्या असल्याने काही गणेशभक्त या मूर्तीना पसंती देतात. प्लास्टर ऑफ पॅरिसच्या मूर्तीमुळे स्थानिक मूर्तीकारांच्या व्यवसायाला फटका बसत आहे, अशी खंत रमाकांत शेटकर (डिचोली), सज्जन गावकर (कारापूर) आणि कालिदास शेट (मये) या मूर्तिकारांनी व्यक्त केली.

चित्रशाळेत लगबग

शंभरहून अधिक चित्रशाळा असून, मये गावात सर्वाधिक चित्रशाळा आहेत. चतुर्थीला साधारण सव्वा महिना राहिल्याने डिचोलीत विविध भागातील चित्रशाळांमधून मूर्तीकारांच्या हातांनी वेग घेतला आहे.

गणपतीच्या मूर्तीही आकार घेऊ लागल्या आहेत. डिचोलीसह, मये, कारापूर आदी भागातील चित्रशाळांमधून सध्या गणपती बनविण्याचे काम सुरू आहे. पुढील दहा-बारा दिवसांनी या कामाला जोर येण्याचे संकेत आहेत.