Banastarim Bridge Accident: बाणास्तरी अपघातातील मर्सिडीजच्या चालकाला अटक

Banastarim Bridge Accident: बाणास्तरी पुलावर झालेल्या भीषण अपघाताला कारणीभूत ठरलेल्या मर्सिडीज कारच्या चालकाला अटक करण्यात आली आहे. मार्दोळ पोलिसांनी पहाटे या चालकाला अटक केली. परेश ए. सिनाई सावर्डेकर असे त्याचे नाव आहे.

मद्यधुंद अवस्थेत बेदरकारपणे गाडी चालवून तिघांच्या मृत्यूला कारणीभूत ठरलेल्या सावर्डेकर याच्यावर गुन्हा दाखल करण्याची प्रक्रिया सुरू होती. निष्काळजीपणे गाडी चालवून त्याने सात जणांना जखमीही केले.

फोंड्याहून ही मर्सडीज  (जीए - 07- के - 7311)  भरधाव वेगाने आली. मर्सिडीजने तीन दुचाक्यांना ठोकर दिली, त्यानंतर दोन आल्टो व स्वीफ्ट कारला धडक दिली आणि त्यानंतर ती गाडी दुभाजकावर स्थिरावली. या काळातही चालकाला अपघात घडला याचे भानही नव्हते. त्यामुळेच पाच, सहा गाड्यांना मर्सिडीज चालकाने ठोकरले.

या अपघातात एका दांपत्यांचा मृत्यू झाल्याने त्यांची दोन मुले पोरकी झाली. या अपघातात वनिता भंडारी (२१, रा. सांताक्रूझ-फोंडा), शंकर हळर्णकर (६७, रा. बाणास्तरी), राज माजगावकर (२७, रा. ताळगाव) हे गंभीर जखमी झाले.