G20 Summit देशाच्या राजधानीत म्हणजेच दिल्लीत G-20 शिखर परिषद आयोजित करण्यात आली असून या G-20 परिषदेसाठी परदेशी पाहुणे देखील सहभागी झाले आहेत. या परिषदेत अनेक मुद्द्यांवर चर्चा झाली त्यात गोव्याच्या दृष्टीने गौरवाची गोष्ट घडलीय.

गोव्याच्या पर्यटनाच्या रोडमॅपवर या परिषदेत चर्चा करण्यात आलीय. त्यामुळे साहजिकच गोवा पुन्हा एकदा चर्चेत आलाय.

19 ते 22 जून दरम्यान गोव्यात झालेल्या G20 बैठकीत गोवा रोडमॅप मंजूर करण्यात आला होता. पर्यटन सचिव व्ही विद्यावती यांनी गोवा रोडमॅपच्या पाच प्राधान्यक्रमांची माहिती दिली. शाश्वत पर्यटन अर्थात हरित पर्यटन, डिजिटलायझेशन, कौशल्य, पर्यटन एमएसएमई आणि डेस्टिनेशन मॅनेजमेंट साध्य करण्यासाठी याची अंमलबजावणी केली जाईल, असे ते म्हणाले.

केवळ भारतातीलच नव्हे तर संपूर्ण जगासाठी शाश्वत पर्यटनासाठी एक रोडमॅप महत्वाचा असून सर्व G-20 सदस्य देश, अतिथी देश आणि आंतरराष्ट्रीय संस्थांनी शाश्वत विकास उद्दिष्टे साध्य करण्यासाठी गोवा रोडमॅपला अंतिम रूप देण्याच्या प्रयत्नांना मान्यता दिली आहे.