Goa G-20 Summit : जी-20 स्वच्छ ऊर्जा मंत्रिस्तरीय 14 व्या आणि मिशन इनोव्हेशनच्या आठव्या बैठकीला आज गोव्यात प्रारंभ झाला. त्‍यात 34 पेक्षा जास्त सदस्य देश सहभागी झाले आहेत. स्वच्छ ऊर्जाविषयक त्रिसदस्यीय मंत्रिगटाच्या इतर सदस्यांचे (अमेरिका आणि ब्राझिल) विशेष संबोधन, सीईएम आणि एमआयच्या सचिवांची भाषणे झाली.

‘स्वच्छ ऊर्जेच्या दिशेने एकत्रितपणे आगेकूच’ ही या वर्षाची संकल्पना आहे. सीईएम बैठकीच्या पहिल्या दिवशी सीईएम कार्य समन्वयक, आंतरराष्ट्रीय संस्था, संशोधक, धोरणतज्‍ज्ञ, उद्योग क्षेत्रातील व्यावसायिक आणि इतरांसह 800 पेक्षा जास्त प्रतिनिधी उपस्थित आहेत.

या कार्यक्रमामध्ये 50 पेक्षा जास्त भागीदारांकडून 30 इतर कार्यक्रमांचे आयोजन करण्यात आले आहे. ऊर्जा कार्यक्षमता, स्वच्छ इंधने, स्वच्छ ऊर्जा, वाहने आणि उद्योगांमधील कार्बनमुक्ती अशा विविध संकल्पनांचा या उपकार्यक्रमांमध्ये समावेश होता.

मंत्रिस्तरीय बैठक आज

उद्या शुक्रवार दि. २१ जुलै रोजी मंत्रिस्तरीय बैठक होणार आहे तर 22 जुलैला एकापाठोपाठ एक अशा जी-20 ऊर्जा संक्रमण मंत्रिस्तरीय बैठका होणार आहेत.

या बैठकांसोबत इतर संवाद, चर्चा आणि प्रदर्शन कार्यक्रम होत आहेत. जी-20 अध्यक्षपदाच्या कार्यकाळात स्वच्छ ऊर्जा संक्रमणामध्ये जागतिक सहकार्य मजबूत करण्यासाठी भारत वचनबद्ध आहे.