पणजी: गोव्यात व्हिसाची मुदत संपल्यानंतरही बेकायदेशीरपणे वास्तव्य करणाऱ्या परदेशी नागरिकांविरुद्ध ‘फॉरेनर्स रिजनल रजिस्ट्रेशन ऑफिस’च्या (एफआरआरओ) विशेष कृती दलाने कारवाई केली.

या मोहिमेअंतर्गत एकूण ९ परदेशी नागरिकांचा शोध लावण्यात आला असून, त्यात ७ रशियन आणि २ युक्रेनियन नागरिकांचा समावेश आहे. मिळालेल्या माहितीनुसार, शोध घेण्यात आलेल्या ७ रशियन नागरिकांमध्ये दोन अल्पवयीन मुलांचाही समावेश आहे.

या ९ जणांपैकी २ रशियन नागरिकांनी आधीच भारत सोडून मायदेशी प्रयाण केले आहे. उर्वरित परदेशी नागरिकांच्या कागदपत्रांची पडताळणी सुरू असून, त्यांच्यासाठी 'एक्झिट परमिट' आणि व्हिसा बदलाबाबतचे अर्ज प्रक्रियेत आहेत.

‘एफआरआरओ’च्या पोलीस अधीक्षक अर्शी आदिल यांच्या मार्गदर्शनात ही कारवाई केली. तसेच पोलिस अधीक्षक/उपअधीक्षक ब्राझ मिनेझिस यांनी या मोहिमेवर प्रत्यक्ष लक्ष ठेवले होते. प्रत्यक्ष क्षेत्रीय कारवाईचे नेतृत्व पोलिस निरीक्षक देवेंद्र, उपनिरीक्षक पराग पारेख आणि आयआरबीएनच्या पथकाने केले.