Goa Traffic Jam: झुआरी पुलावरील वाहतूक सुरळीतपणे व्हावी याला महत्व न देता नवीन पुलावर लोकांना सेल्फी काढण्यास प्राधान्य देण्याचा गोवा सरकारचा निर्णय हा मूर्खपणाचा कळस अशी जळजळीत प्रतिक्रीया गोवा फॉरवर्डचे अध्यक्ष विजय सरदेसाई यांनी दिली आहे.

दरम्यान, झुआरी पुलावर (Zuari Bridge) झालेल्या वाहतूक कोंडीमुळे लोकांना कित्येक तास रस्त्यावर अडकून पडावे लागले. या कोंडीत रुग्ण वाहिकाही अडकल्या. लोकांचे जीवन धोक्यात आणणारा हा निर्णय मूर्खपणाचा कळस असल्याचे ट्विट सरदेसाई यांनी केले असून प्रधानमंत्री नरेंद्र मोदी (Narendra Modi) आणि केंद्रिय दळणवळण मंत्री नितीन गडकरी यांनाही टॅग करुन हे सरकार अशा प्रकारे लोकांचे जिणे का हराम करते असा सवाल सरदेसाई यांनी केला आहे.

दुसरीकडे, कुणाच्या तरी डोक्यात आलेली ही सेल्फीची हुक्की लोकांचा जीव धोक्यात घालणारी याची सरकारला कल्पना आहे का? असा सवाल करुन कुणाच्या जीवाला धोका पोहोचला असता तर त्याची जबाबदारी सार्वजनिक बांधकाम मंत्री निलेश काब्राल घेणार का असाही सवालही सरदेसाई यांनी उपस्थित केला.

तसेच, आणखी एका ट्विटमध्ये सरदेसाई यांनी नितीन गडकरी यांनी या पूलाचे उद्घाटन 19 डिसेंबर रोजी व्हरच्युअल पद्धतीने करण्याचाही सल्ला दिला होता. विशेष म्हणजे, या सल्ल्याची आठवण करुन देताना सध्या गोव्यात जे कारभार चालवतात त्यांनी हा सल्ला धुडकावून गोव्यात (Goa) ऐन गर्दीच्या मोसमात या पुलावर सेल्फी उत्सव आयोजित करुन लोकांचा जीव धोक्यात घातला.