शिरोडा: गोवा फॉरवर्ड पक्ष युथ विंगच्या उपाध्यक्ष रुनाल केरकर यांच्यावर जीवघेणी हल्ला करण्यात आल्याची घटना उघडकीस आली आहे. शिरोडा येथील कामाक्षी मंदिराजवळ शनिवारी (०६ सप्टेंबर) सकाळी ही घटना घडली. रेकॉर्डवरील गुन्हेगारांनी हा हल्ला केल्याचा आरोप केला जात आहे.

मिळालेल्या माहितीनुसार, रुनाल केरकर चोडणचे रहिवासी असून, गोवा फॉरवर्ड पक्ष युथ विंगच्या उपाध्यक्षापदी कार्यरत आहेत. शनिवारी पहाटेच्या सुमारास कामाक्षी मंदिराजवळ त्यांच्यावर चारजणांनी जीवघेणा हल्ला केल, यात रुनाल गंभीर जखमी झाले आहे संशयितांनी रुनाल यांच्या कारचे देखील मोठ्या प्रमाणावर नुकसान केले आहे.

पोलिसांनी याप्रकरणी गुन्हा नोंद करुन तपास सुरु केला आहे. हल्ला केलेले रेकॉर्डवरील गुन्हेगार असल्याची माहिती समोर आली आहे. दरम्यान, पोलिसांनी हल्लेखोरांना अटक करण्यासाठी तपासाची चक्रे गतीमान केली आहेत. केरकर यांच्यावरील हल्ल्याचा गोवा फॉरवर्डकडून निषेध करण्यात आला आहे.

गोवा फॉरवर्ड पर्यावरण विभागाचे संयोजक विकास भगत यांनी याप्रकरणी प्रतिक्रिया व्यक्त करताना राज्यातील कायदा आणि सुव्यवस्था बिघडली असल्याचे मत व्यक्त केले. "रुनाल यांच्यावर जीवघेणा हल्ल करण्यात आला आहे.

आम्ही या भ्याड हल्ल्याचा तीव्र निषेध करतो. अशा घटना सिद्ध करतात की गोवा सरकार गाढ झोपेत आहे. राज्यातील कायदा सुव्यवस्था कोलमडली असताना मुख्यमंत्री राजकीय अजेंडा राबविण्यात व्यस्त आहेत," अशी प्रतिक्रिया भगत यांनी व्यक्त केली.