पणजी : काँग्रेसने आगामी गोवा विधानसभा निवडणुकीसाठी गोवा फॉरवर्डला दोनच जागा जाहीर केल्या आहेत. मात्र त्यामुळे गोवा फॉरवर्डचे विद्यमान आमदार आणि इच्छु उमेदवार नाराज झाल्याचं चित्र होतं. आता गोवा काँग्रेस प्रभारी दिनेश गुंडू राव यांनी गोवा फॉरवर्डला जास्त जागा मिळू शकतील, असे स्पष्ट संकेत दिले आहेत.

काँग्रेसने पुढील जाहीर होणाऱ्या याद्यांमध्ये गोवा फॉरवर्डला जागा वाढवून देण्याचे संकेत दिले आहेत. फॉरवर्डला जागा देण्याचा विचार सुरु आहे. याबाबत लवकरच निर्णय घेतला जाईल असं दिनेश गुंडू राव यांनी सांगितलं आहे. गोवा विधानसभेच्या (Goa Assembly Election) पार्श्वभूमीवर काँग्रेसने गोवा फॉरवर्ड पक्षासोबत युती केली होती. त्याचा जागावाटपाचा फॉर्म्युलाही ठरला होता. या जागावाटपात दक्षिण गोव्यात फातोर्डा आणि उत्तर गोव्यात मये हे दोन मतदारसंघ काँग्रेसने (Congress) गोवा फॉरवर्डसाठी सोडले आहेत.

फातोर्डा मतदारसंघात काँग्रेसने गोवा फॉरवर्डचे साठी जागा सोडल्या आहेत. गोवा फॉरवर्डचे (Goa Forward Party) अध्यक्ष आणि आमदार विजय सरदेसाई (Vijay Sardesai), तर मये मतदारसंघात संतोष कुमार सावंत हे फॉरवर्डचे उमेदवार आहेत. जागावाटपामध्ये फक्त दोन जागा मिळाल्याने शिवोलीमधील विद्यमान आमदार विनोद पालयेकर, मांद्रे मतदारसंघात दीपक कळंगुटकर आणि सांत आंद्रेमध्ये जगदीश भोबे यांची उमेदवारी धोक्यात आल्याचं चित्र होतं.