Sylvan Ecotourism Cottages Bondla Opening

फोंडा: गोवा वनविकास महामंडळाने इको टुरिझम डेव्हलपमेंटअंतर्गत पहिला प्रकल्प विकसित केला आहे. बोंडला वन्यजीव अभयारण्यातील ‘सिल्वन’ या इको-टुरिझम रिसॉर्टचे लोकार्पण आज सोमवारी वनमंत्री विश्‍‍वजीत राणे यांच्या हस्ते करण्यात आले.

ते म्‍हणाले, उसगावातील सुमारे चारशे ते पाचशे लोकांना रोजगाराच्या संधी उपलब्ध करून देण्याच्या उद्देशाने या प्रकल्‍पाचा आणखी विस्तार करण्‍यात येईल. तसेच भविष्यात जीएफडीसी पर्यावरण-पर्यटनाशी संबंधित नोडल एजन्सी म्हणून काम करेल.

यावेळी गोवा वनविकास महामंडळाच्‍या अध्यक्षा आमदार डॉ. दिव्‍या राणे, प्रधान मुख्य वनसंरक्षक कमल डी. (आयएफएस), वन्यजीव मुख्य वॉर्डन प्रवीणकुमार राघव (आयएफएस) आणि मान्यवर उपस्थित होते.

राज्यात इको-टुरिझमला चालना देण्याची गरज आहे. तसेच त्‍या भागातील स्थानिकांना रोजगार उपलब्ध करून देण्यावर भर देण्‍यात येईल. बोंडला येथील १० रिसॉर्टसह ‘सिल्वन’ प्रकल्पाचा आकार बदलून लोकांच्या मोठ्या गटासाठी पुनर्विकास केला जाऊ शकतो. मी आधीच सीसीएफसोबत कल्पना मांडली असून त्यावर सहमती झाली आहे. त्‍यामुळे बोंडला येथे सुमारे ४०० ते ५०० लोकांना रोजगार उपलब्ध होऊ शकतो, असे राणे म्हणाले.