गोव्यात गेल्या काही दिवसांपासून अन्न आणि औषध प्रशानसनाकडून धडक मोहीम राबवण्यात येत आहे. यातच आता, प्रशासनाने एक मोठी कारवाई केली आहे. उत्तर गोव्यातील समुद्रकिनारी असलेल्या काजूच्या तीन दुकानावर ही कारवाई करण्यात आली. FSSAI परवान्याशिवाय ही दुकाने सुरु होती. प्रशासनाने कारवाई करत तात्काळ दुकाने बंद करण्याचे आदेश मालकांना दिले आहेत. हद्द म्हणजे, या तीनही दुकानात निकृष्ट दर्जाचे काजू मिसळून विकले जात होते. कळंगुट येथे ग्राहकांची दिशाभूल केली जात असल्याचे प्रशासनाला आढळून आले. 1 लाख किमतीचा साठाही नष्ट करण्यात आला आहे. याशिवाय, कळंगुट सर्कलजवळील एका दुकानातून ई-सिगारेट आणि विदेशी सिगारेट जप्त करण्यात आली.

म्हापसा बसस्थानकावर कारवाई!

काही दिवसांपूर्वीच, म्हापसा बसस्थानकावरुन मोठा मुद्देमाल जप्त करण्यात आला होता. प्रशासनाने म्हापसा बस स्थानकावरुन तब्बल दीड लाखांचे 500 किलो पनीर जप्त केले होते. मुंबईतून गोव्यात येणारे फ्रोजन फूड, मावा, मसाले यासारखे खाद्यपदार्थ या छापेमारीत जप्त केले होते. रिचर्ड नोरोन्हा यांच्या नेतृत्वाखालील FDA अधिकाऱ्यांनी खाजगी वाहनांची अचानक तपासणी करुन दीड लाखांचे पनीर जप्त केले होते. महाराष्ट्र आणि कर्नाटक येथून येणाऱ्या खाजगी वाहनावर ही कारवाई करण्यात आली होती.

तसेच, म्हापसा, हणजुणे, कोलवाळ येथे बेकायदेशीररित्या तंबाखूजन्य पदार्थांची विक्री करणाऱ्या दुकानांवर म्हापसा पोलिसांनी कारवाई केली होती. दुकानमालक आणि विक्रेत्यांविरोधात ही कारवाई करण्यात आली होती.