Goa - Lucknow Flight Horrifying Experience

पणजी: अहमदाबाद येथे एअर इंडिया विमानाच्या झालेल्या अपघातात २६५ जणांचा दुर्दैवी मृत्यू झाला. या अपघातातून देश सावरत असताना गोव्यातून काळजाचा ठोका चुकवणारी एक घटना समोर आली आहे. गोवा विमानतळावरुन उड्डाण घेताच इंडिगोच्या विमानाचा तोल जाऊन, विमान खाली येऊ लागले, पायलटने प्रसंगावधान दाखवत विमान नियंत्रित केले. पण, लखनऊपर्यंतचा पूर्ण प्रवासात १७२ प्रवाशांनी जीव मुठीत घेऊन प्रवास केला.

"गोव्यातून इंडिगो कंपनीचे ६ई - ६८११ विमानाने दुपारी ३.४८ वाजता लखनऊसाठी उड्डाण घेतले. उड्डाण घेल्यानंतर विमानाचा तोल जाऊन विमान जमीनीच्या दिशेने येऊ लागले. विमान कोसळणार की या भीतीने विमानातील प्रवाशांनी जीवाच्या आकांताने आक्रोश केला. दरम्यान, वैमानिकाने प्रसंगावधान दाखवत विमान नियंत्रित करत सुरक्षितपणे लखनऊच्या अमौसी विमानतळावर सुरक्षितपणे उतरले," असा थरारक अनुभव या विमानातून प्रवास करणाऱ्या प्रवासी जॉली खान यांनी सांगितला आहे.

"अहमदाबाद येथील विमान दुर्घटनेमुळे भीतीच्या छायेत असणारे प्रवासी गोव्यात घडलेल्या या प्रकारामुळे भलतेच घाबरले. विमानातून १७२ प्रवासी प्रवास करत होते. लखनऊ पर्यंतचा जवळपास अडीच तासांचा प्रवास प्रवाशांनी जीव मुठीत घेऊन केला. लखनऊ विमानतळावर दाखल झाल्यानंतर प्रवाशांनी सुटकेचा निश्वास सोडला, पण सर्व प्रवाशांवर भीती स्पष्ट दिसत होती," असे खान यांनी म्हटले आहे.

दरम्यान, "विमानात तांत्रिक बिघाड असल्यामुळे असं झालं का? आणखी काय? याचा तपास व्हायला हवा असा सवाल देखील खान यांनी उपस्थित केला आहे. या घटनेबाबत प्रवाशांना कोणतीही माहिती देण्यात आली नाही. हवामानामुळे असं घडलं का याबाबत सूचना करण्यात आली नाही, विमानाचा पायलट, आणि प्रथम अधिकारी यांची चौकशी व्हायला हवी," असेही खान म्हणाल्या.

अहमदाबाद येथे घडलेल्या दुर्दैवी घटनेनंतर विमानांची सुरक्षा आणि देखभाल याबाबत सवाल उपस्थित केले जात आहेत. त्यानंतर आता गोव्यात घडलेल्या या घटनेमुळे १७२ प्रवासी चांगलेच घाबरले आहेत.

इंडिगोचा वैमानिक, अधिकारी यांची सखोल चौकशी करण्याची मागणी प्रवाशांनी केली आहे. तसेच, विमानात देखील नेमका काय बिघाड झाला होता का? किंवा झालेला प्रकार का घडला? याचे कारण शोधण्याची मागणी केली आहे.