वास्को: एलईडी दिव्यांचा वापर करून मासेमारी करणाऱ्यांविरोधात गोवा मत्स्योद्योग खात्याने फक्त दंडात्मक कारवाई न करता संबंधित बोट व एलईडी दिवे जप्त करण्याची गरज आहे, असे मत पारंपरिक मच्छीमार बांधवांनी येथे सोमवारी व्यक्त केले.

मस्त्योद्योग खात्याच्या संचालिका यशस्विनी तसेच खात्याने केलेल्या कारवाईचे त्यांनी कौतुक केले व भविष्यातही अशा कारवाया होण्याची गरज त्यांनी व्यक्त केली.

पारंपरिक मच्छीमार ओलंसियो सिमोईस यांनी एलईडी दिव्यांचा वापर करून मच्छीमारी करण्यास प्रतिबंध घालणारा कायदा २०१५ मध्ये देशभरात लागू करण्यात आला. तथापि, गोव्याच्या समुद्रात एलईडी दिव्यांचा वापर करणाऱ्या एकाही बोटमालकाविरोधात गेल्या दहा वर्षांत कारवाई झाली नव्हती.

प्रथमच एक बोट शापोरा किनाऱ्यावर पकडण्यात आली आहे. यावरून गोव्याच्या किनारपट्टीवर एलईडी दिव्यांचा वापर करून मासेमारी केली जात असल्याचे सिध्द होते, असे सांगितले.

यासंबंधीचे प्रकरण उच्च न्यायालयात प्रलंबित असतानाही संबंधित बोटमालक बिनदिक्कतपणे एलईडी दिव्यांचा वापर करून मासेमारी करतात. त्यांना पोलिस, मत्स्योद्योग खाते यांची भीती नसल्याचे दिसून येते. मत्स्योद्योग खात्याने बेकायदा मासेमारी करणाऱ्यांविरोधात कारवाई करण्याची गरज आहे. त्यांना दंड ठोठावून काहीच होणार नाही. त्यांच्या बोटी जप्त करण्याची गरज असल्याचे त्यांनी स्पष्ट केले.

कर्नाटकातील मच्छीमारांविरुद्ध कारवाईची मागणी

किस्तोदिओ डिसोझा यांनी या कारवाईमुळे आमचा उत्साह वाढला असल्याचे सांगितले. अशा प्रकारच्या कारवाया होण्याची गरज आहे. कर्नाटक व इतर राज्यांतील मच्छीमारी बोटी गोव्याच्या किनारपट्टीवर येऊन मासेमारी करतात. त्यांच्याविरोधात कारवाई होण्यासाठी पावले उचलण्याची गरज आहे. त्याचप्रमाणे दंडाची रक्कम वाढविण्याची गरज आहे, असेही ते म्हणाले.