Goa Fish Rate: मत्सप्रेमी गोमंतकीयांना गेल्या महिन्याभरापासून सुगीचे दिवस आले आहेत. मोठ्या प्रमाणात मासळीचे बंपर पीक आल्याने आणि त्यात बांगड्यांचे पीक मोठ्या प्रमाणात आल्याने शंभर रुपयांना चक्क बारा ते पंधरा बांगडे ग्राहकांना विकले जातात. गेल्या आठवड्यात तर 100 रुपयांना वीस बांगडे विकले जात होते.

बांगड्याबरोबरच कर्ली, समुद्री खेकडे, सुंगटे, इसवण, लेपो आदी मासळीही मुबलक प्रमाणात उपलब्ध होत आहे. मासळी खरेदीसाठी आज पणजी बाजारात ग्राहकांची वर्दळ अधिक होती. गोव्यात अनेक पर्यटक तसेच खवय्ये मासळीपासून बनविलेल्या वेगवगेळ्या पदार्थांचा आस्वाद घेण्यासाठी येतात.

राज्यात सर्वत्रच मासळीचे दर समाधानकारक आहेत. मात्र, अजून हॉटेलमध्ये थाळी महागच मिळते. केवळ एक तळलेला बांगडा पणजी शहरात घ्यायचे म्हटले तर 70 ते 80 रूपये आकारले जातात. मासळीचे दर (प्रतिकिलो) बांगडे 100 रु, कर्ली 300 रु, समुद्री खेकडे 300 रु, सुंगटे 300 ते 400 रु, इसवण 500 ते 550 रु, लेपो 300 रु असे आहेत.