पणजी: रायबंदर ते चोडण जलमार्गावर कार्यरत ‘शिवनेरी’ फेरीबोटीच्या हायड्रोलिक गिअर बॉक्समध्ये एका मुलीचे केस अडकले. मात्र, प्रसंगावधान राखून फेरीबोटचालकाने तात्काळ गिअर बॉक्स बंद केला आणि लोकांच्या मदतीने तिचे बॉक्समध्ये अडकलेले केस कापून सुटका केली.

ही मुलगी डिचोलीतील अवर लेडी ऑफ ग्रेस स्कूलची दहावीची विद्यार्थिनी आहे. सोमवारी रात्री या फेरीबोटीत गर्दी होती. त्यामुळे त्या मुलीला हायड्रोलिक गिअर बॉक्सजवळ उभे रहावे लागले. यावेळी वाऱ्यामुळे तिचे केस उडाले आणि गिअर बॉक्समध्ये अडकले. मुलीचे केस यंत्रात अडकल्याचे लक्षात आल्यावर लोकांनी आरडाओरडा केल्याने कॅप्टनने फेरीबोट थांबविली. त्यानंतर त्या मुलीचे केस कापून सुटका केली.

यापूर्वी या फेरीबोटींवर कर्मचाऱ्यांद्वारे लोखंडी रॅम्प खाली-वर केला जात होता. मात्र, दोन कर्मचाऱ्यांची बोटे या यंत्रात अडकण्याच्या घटना घडल्यामुळे नव्याने तयार केलेल्या फेरीबोटींवर हायड्रोलिक यंत्रणा बसविली आहे. ती यंत्रणा पूर्ण सुरक्षित आहेत. मात्र, प्रवाशांनी अशा ठिकाणी उभे राहणे टाळावे. गर्दी असल्यास सुरक्षित ठिकाणी उभे रहावे. असे अपघात घडू नयेत यासाठी आम्हीही काळजी घेऊ, असे आवाहन नदी परिवहन खात्याचे संचालक विक्रमसिंह राजे भोसले यांनी केले.

धास्तावलेल्या मुलीला भोवळ

अचानक घडलेल्या या घटनेमुळे त्या मुलीला भोवळ आली. त्यावेळी बोटीतील प्रवाशांनी मुलीला रुग्णालयात उपचारासाठी नेले. काही वेळाने तिच्या भावाने संचालक विक्रमसिंह राजे भोसले यांच्याकडे वाहनाची व तिच्यावरील उपाचारासाठी मदत मागितली. त्या मुलीला रुग्णालयात नेण्यासाठी वाहन पाठविले, असे विक्रमसिंह राजे भोसले यांनी सांगितले.