पणजी: अन्न व औषध प्रशासनाकडून खाद्यान्न सुरक्षेच्या नियमांचे उल्लंघन करणाऱ्यांविरोधात मोहीम राबवली जात असून मंगळवारी (11 ऑगस्ट) ताळगाव येथे एक मोठी कारवाई करण्यात आली. बेळगावातून गोव्यात विक्रीसाठी आणली जाणारी सुमारे 120 किलो निकृष्ट आणि असुरक्षित मिठाई एफडीएच्या अधिकाऱ्यांनी जप्त केली. जप्त करण्यात आलेली ही मिठाई आरोग्यासाठी हानीकारक असल्याने त्यांच्याकडून नष्टही करण्यात आली. या कारवाईमुळे गोव्यात भेसळयुक्त अन्नपदार्थ आणणाऱ्या पुरवठादारांचे धाबे दणाणले आहेत.

मिळालेल्या माहितीनुसार, ताळगाव परिसरात संशयास्पदरीत्या फिरणाऱ्या एका खाजगी एर्टिका कारला (क्रमांक KA 22 MB 2137) एफडीएच्या पथकाने अडवले. या वाहनाची झडती घेतली असता, त्यात मोठ्या प्रमाणावर विविध प्रकारची मिठाई आढळून आली, जी गोव्यातील स्थानिक विक्रेत्यांना पुरवली जाणार होती. या मिठाईचा मुख्य पुरवठादार बेळगाव येथील हस्तीमल गोहिलोट हा असल्याचे समोर आले.

धक्कादायक बाब म्हणजे, मिठाई तयार करण्यासाठी या पुरवठादाराकडे कोणतेही वैध 'एफएसएसएआय' (FSSAI) लायसन्स नव्हते. कोणत्याही परवान्याशिवाय आणि सुरक्षिततेचे नियम न पाळता हा व्यवसाय बेकायदेशीररित्या सुरु होता.

या गंभीर प्रकारानंतर एफडीएच्या अधिकाऱ्यांनी 120 किलो मिठाईचा साठा जप्त करुन त्याची विल्हेवाट लावली. या बेकायदेशीर व्यवसायाचे मूळ बेळगावात असल्याने पुढील कडक कारवाईसाठी हा गुन्हा बेळगाव एफडीएकडे वर्ग करण्यात आला. तसेच, मिठाईच्या व्यावसायिक वाहतुकीसाठी खाजगी कारचा बेकायदेशीर वापर केल्याप्रकरणी बेळगाव प्रादेशिक परिवहन कार्यालयाला (RTO) देखील लेखी अहवाल पाठवून वाहनावर कारवाई करण्याची शिफारस करण्यात आली. गोव्यातील नागरिकांच्या आरोग्याशी खेळणाऱ्या अशा कोणाचीही गय केली जाणार नाही, असा इशारा प्रशासनाने दिला.