मध्य प्रदेश: गोव्यात कामाच्या शोधात आलेल्या तरुणाचा गावी माघारी जाताना अपघात झाला. या अपघातात तरुणाने त्याचा एक पाय गमावला आहे. तरुण गोव्यात काम न मिळाल्याने गावी माघारी जात होता. दरम्यान, धावती ट्रेन पकडताना पाय घसरुन त्याचा एक पाय तुटला. मध्य प्रदेशातील, दातिया रेल्वे स्थानकाजवळ शुक्रवारी (१८ एप्रिल) सकाळी ही घटना घडली.

धर्मेंद्र कुशवाह असे या तरुणाचे नाव आहे. धर्मेंद्र ग्वाल्हेरचा रहिवासी आहे. गोव्याहून त्याच्या घरी परत जात असताना हा अपघात झाला. अपघाताची माहिती मिळताच रेल्वे पोलिस (GRP) घटनास्थळी पोहोचले आणि जखमी धर्मेद्रला तातडीने जिल्हा रुग्णालयात दाखल करण्यात आले. प्राथमिक उपचारानंतर, गंभीर प्रकृती लक्षात घेता पुढील उपचारासाठी त्याला झाशी मेडिकल कॉलेजमध्ये हलविण्यात आले.

"धर्मेंद्र रोजंदारीवर काम करतो. तीन दिवसांपूर्वी तो त्याच्या मित्रांसह कामाच्या शोधात गोव्याला गेला होता. गोव्यात काम न मिळाल्याने तो गावी माघारी येत होता. गोवा एक्सप्रेसमधून तो प्रवास करत होता, त्याचवेळी हा अपघात झाला", अशी माहिती धर्मेंद्रचा भाऊ दिनेश कुशवाहा याने एका स्थानिक वृत्तपत्राला दिली आहे.

मध्य प्रदेशातील स्थानिक वृत्तपत्रांनी दिलेल्या वृत्तानुसार, धर्मेंद्र कुशवाह गोवा एक्सप्रेसमधून त्याच्या गावाकडे प्रवास करत होता. दरम्यान, दातिया आणि चिरुला स्थानकांदरम्यान बाह्य सिग्नलवर ही ट्रेन थांबली होती. यावेळी धर्मेंद्र ट्रेनमधून खाली उतरला. ट्रेन पुन्हा सुरु झाल्यानंतर तो धावत्या ढण्याचा प्रयत्न करत होता पण अचानक त्याचा पाय घसरला आणि तो खाली पडला. यातचा त्याचा पाय तुटला. तरुणावर सध्या उपचार सुरू आहेत. या अपघातप्रकरणी रेल्वे प्रशासन तपास करत आहे.