गेल्या काही दिवसांपासून राज्यात पावसाने काहीशी उघडीप घेतली आहे. मात्र पुढील पाच दिवस राज्यात तुरळक तसेच मध्यम स्वरूपाच्या पावसाची शक्यता हवामान खात्याच्या वेधशाळेने वर्तवली आहे. गेल्या 24 तासात राज्यात केवळ 3.1 मिलीमीटर पावसाची नोंद झाली आहे.

(Goa expects LIGHT to MODERATE Rain at MANY PLACES by August end)

वेधशाळेने वर्तवलेल्या अंदाजानुसार राज्यातील काही भागात 27 आणि 28 ऑगस्ट रोजी हलका ते मध्यम स्वरुपाच्या पावसाची शक्यता वर्तवण्यात आली आहे. तसेच 29 तारखेला अनेक ठिकाणी हलका ते मध्यम स्वरुपाचा पाऊस गडगडाटसह बरसण्याची शक्यता आहे. तसेच 30 आणि 31 ऑगस्ट रोजी अनेक ठिकाणी गडगडाट पावसाची शक्यता वर्तवण्यात आली आहे.

राज्यात गेल्या काही दिवसांपासून दडी मारलेल्या पावसांमूळे डोंगर भागात असलेल्या खरीप पिके पाण्याअभावी सूकत असल्याचं चित्र आहे. तसेच भाता सारखी पिके आता पोटरीला आली असल्याने भात फोल जाण्याची शक्यता निर्माण झाली आहे.

शेतकऱ्यांचे नुकसान होऊ नये यासाठी पावसाने हजेरी लावत दिलासा देणे आवश्यक आहे. वेधशाळेने वर्तवलेल्या अंदाजानुसार राज्यात आत्तापर्यंत 102 इंच पाऊस बरसण्याची अपेक्षा होती. मात्र प्रत्यक्षात 93.14 इंच पावसाची नोंद झाली आहे. जो सरासरी पावसाच्या तुलनेत - 8.9 टक्क्यांनी कमी आहे. त्यामूळे सध्या राज्यातील धरणे पुर्ण क्षमतेने भरली असली तरी खरीप पिकांची स्थिती पाहता पावसाने हजेरी लावणे आवश्यक बनले आहे.