डिचोली: डिचोली (Bicholim) तालुक्यातील वेळगे पंचायतीच्या सरपंचपदाची माळ मुकेश घाटवळ (Mukesh Ghatwal) यांच्या गळ्यात पडली आहे. रिक्त सरपंचपदासाठी मंगळवारी रोजी घेण्यात आलेल्या बैठकीत श्री.घाटवळ यांची सरपंचपदी बिनविरोध निवड झाली. अलीकडेच महेश गवंडे यांनी सरपंचपदाचा राजीनामा दिल्याने हे पद रिक्त झाले होते. सरपंच पदाची निवडणूक घेण्यासाठी मंगळवारी पंचायत मंडळाची बैठक घेण्यात आली.

या बैठकीस मावळते सरपंच महेश गवंडे यांच्यासह उपसरपंच उन्नती सहस्त्रबुद्धे सामंता कामत, केदार घाडी, दुर्गादास नाईक आणि गोविंद गावकर हे पंचसदस्य उपस्थित होते. सरपंच पदासाठी श्री. घाटवळ यांनी दाखल केलेला अर्ज निर्वाचन अधिकाऱ्यांनी ग्राह्य धरून श्री. घाटवळ यांची सरपंचपदी बिनविरोध निवड जाहीर केली. मुख्यमंत्री डॉ. प्रमोद सावंत यांच्या सहकार्याने पंचायतीचा विकास करण्यासाठी आपण कार्यरत राहणार असल्याचे नवनिर्वाचित सरपंच मुकेश घाटवळ यांनी सांगितले. सरपंच निवडणुकीवेळी अमित घाडी , सनिल प्रभू, अवधूत धोंड आणि इतर ग्रामस्थ उपस्थित होते.