Bicholim: नमाज, भव्य जुलूस (Procession) आदी परंपरिक कार्यक्रमांनिशी डिचोलीतील मुस्लिम बांधवांतर्फे (Muslim Community) आज मंगळवारी ईद -ए-मिलाद (Eid-e-Milad) मोठ्या उत्साहात साजरी करण्यात आली. त्यानिमित्त दुपारी डिचोलीत भव्य 'जुलूस' (मिरवणूक) काढण्यात आली. या मिरवणुकीत पाचशेहून अधिक मुस्लिम बांधवांनी सहभागी होत शक्तीप्रदर्शन केले. या मिरवणुकीत लहान मुलांची संख्या लक्षणीय होती. मिरवणूक मात्र सुरळीतपणे पार पडली.

मुस्लिमवाडा येथून मिरवणुकीला प्रारंभ झाला. बसस्थानकापर्यंत आल्यानंतर मिरवणूक माघारी फिरली. ईद-ए-मिलादनिमित्त मुस्लिम बांधवांतर्फे नागरिकांना सरबतही वाटण्यात आले. एकमेकांना शुभेच्छाही देण्यात आल्या. इस्लाम धर्माचे संस्थापक मोहम्मद पैगंबर यांच्या जयंतीनिमित्त ईद-ए-मिलाद साजरी करण्यात येते. यादिवशी मुस्लिम बांधवांतर्फे समाजात सुखशांती लाभावी. अशी प्रार्थना करण्यात येते. दरम्यान, साखळी शहरात मुस्लिम बांधवांतर्फेही 'जुलूस' काढण्यात आली.