पणजी: पहिली व दुसरीच्या विद्यार्थ्यांचे गणित आणि इंग्रजी या विषयांमध्ये कृत्रिम प्रज्ञा चालित 'निपुण' चाचणीद्वारे मूल्यमापन सुरु करण्यात आले आहे. शैक्षणिक सत्र संपत आलेले असतानाच हा उपक्रम राबवला जात आहे.

राज्यातील सरकारी प्राथमिक शाळांमध्ये शिकणाऱ्या पहिली व दुसरीच्या विद्यार्थ्यांचे शिक्षण परिणाम मोजण्यासाठी निपुण चाचणी १७ फेब्रुवारीपासून घेतली जात आहे. चाचणी १ मार्चपर्यंत चालेल. विद्यार्थ्यांचे सर्वंकष मूल्यमापन करून भविष्यातील शैक्षणिक धोरणे ठरवण्यास ही चाचणी मदत करेल.

समग्र शिक्षा गोवा यांच्या वतीने, विद्या समिक्षा केंद्र आणि निपुण विभाग यांच्या संयुक्त विद्यमाने, राज्य शिक्षण संशोधन व प्रशिक्षण परिषद आणि कॉनव्हेजिनीयस यांच्या सहकार्याने कृत्रिम प्रज्ञेवर आधारित निपुण मूल्यमापन सुरू करण्यात आले आहे.

स्वीफ्टचॅटवर आधारित निपुण गोवा चॅटबॉटमध्ये गणित आणि इंग्रजीसाठी प्रत्येकी २० कृत्रिम प्रज्ञा चालित प्रश्न आहेत.