मडगाव: दक्षिण गोवा पोलिसांनी गेल्या दहा दिवसांत अमलीपदार्थविरोधी आठ ठिकाणी केलेल्या छापेमारीत सुमारे ७० लाख रुपयांचा ७ किलो गांजा जप्त केला.

अमली पदार्थ तस्करी, विक्री आणि सेवन खपवून घेतले जाणार नाही, गावागावांत पोलिसांकडून अमलीपदार्थविरोध मोहीम सुरू राहील, अशी माहिती दक्षिण गोवा पोलिस अधीक्षक टिकम सिंग वर्मा यांनी दिली. वर्मा यांनी सांगितले की, गेल्या काही दिवसांपासून दक्षिण गोव्यात विविध ठिकाणी पोलिस अमली पदार्थविरोधी छापेमारी करत आहेत.

वास्कोत गेल्याच आठवड्यात तिघांना गांजासह रंगेहाथ पकडून नंतर त्यांना गांजा पुरवणाऱ्या मुख्य संशयिताला पोलिसांनी ओडिसा येथे पकडून मोठ्या रॅकेटचा पर्दाफाश केला. तसेच मडगाव, फातोर्डा अशा काही ठिकाणी छापेमारी करून गांजा जप्त केला आहे.

एकूण आठ ठिकाणी टाकलेल्या छाप्यांत एका ठिकाणी आम्हाला मोठ्या प्रमाणात गांजा सापडला, अशी माहिती अधीक्षक वर्मा यांनी दिली.