फोंडा: आपण खेळण्यासाठी जात असल्याचे सांगून घराबाहेर पडलेल्या देवांश सीताराम चंदवाडकर (वय १५) या विद्यार्थ्यांचा बुडून मृत्यू झाल्याचे पोलिस चाैकशीनंतर स्पष्ट झाले आहे. धडे-धारबांदोडा येथील दूधसागर नदीवर तो मित्रांसोबत आंघोळीसाठी गेला होता. मात्र देवांशने आपण आंघोळीसाठी जात असल्याचे पालकांना सांगितले नव्हते, त्याच्यासोबत गेलेल्या अन्य एकाला वाचविण्यात त्याच्या मित्रांना यश आले, अशी माहिती पोलिसांनी दिली.

मंगळवारी संध्याकाळी फोंडा येथील क्रीडा संकुलनात खेळण्यासाठी जात असल्याचे सांगून देवांश चंदवाडकर हा आपल्या मित्रांना घेऊन धडे येथील दूधसागर नदीवर गेला. आंघोळ करताना देवांश पाण्यात बुडू लागल्याने अन्य विद्यार्थ्यांनी त्याला वाचवण्याचा प्रयत्न केला. मात्र त्यांना यश आले नाही. मित्रांना दुसऱ्या मित्राला वाचवण्यात यश आले.

देवांश बुडाल्यानंतर चारही जणांनी एकाच स्कूटरवरून फोंडा येथील आपले घर गाठले. मात्र देवांश बुडाल्याची माहिती त्यांनी कुणालाच दिली नाही. मंगळवारी रात्री देवांश घरी परतला नसल्याची माहिती मिळाल्यानंतर पालकांनी फोंडा येथील क्रीडा संकुलनात जाऊन विचारपूस केली.

त्यावेळी क्रीडा संकुलनात देवांश हा आला नव्हता, असे त्यांना कळाले. त्यानंतर पालकांनी देवांश बेपत्ता झाल्याची तक्रार फोंडा पोलीस स्थानकात नोंदवली. त्यानुसार, फोंडा पोलीस स्थानकाचे निरीक्षक विजयनाथ कवळेकर यांनी अन्य चार विद्यार्थ्यांची विचारपूस केली. त्यातून देवांश हा नदीत बुडाल्याचे समोर आले.

मृतदेहाचा शोध सुरूच

मंगळवारीे रात्रीची वेळ झाल्याने शोध कामाला सुरुवात केली गेली नव्हती. पण, बुधवारी सकाळपासून फोंडा अग्निशामक दलाचे कर्मचारी तसेच फोंडा पोलीस आणि परिसरात शोध घेत होते. मात्र त्यांना देवांशचा मृतदेह सापडला नाही. ज्या ठिकाणी ही घटना घडली ते स्थळ प्रतापनगर गावापासून अंदाजे ३-४ किलोमीटर अंतरावर आहे.